ಈ ವಾರ ನಾಮಿನೇಷನ್ ವಿಚಾರದಲ್ಲಿ ಸಾಕಷ್ಟು ಹೈಡ್ರಾಮಾಗಳೇ ನಡೆದಿದ್ದವು. ನಾಮಿನೇಟ್ ಆಗಿದ್ದು ಐದೇ ಸ್ಪರ್ಧಿಗಳು. ಆದರೂ ಯಾರು ಹೊರಹೋಗಬಹುದು ಎಂಬ ನಿರೀಕ್ಷೆ ಜೋರಾಗಿಯೇ ಇತ್ತು. ಆದ್ದರಿಂದ ಬಿಗ್ ಬಾಸ್ ಮನೆಯೊಳಗೆ ನಾಮಿನೇಟ್ ಆಗಿದ್ದ ಸ್ಪರ್ಧಿಗಳು ಟೆನ್ಷನ್‌ನಲ್ಲಿದ್ದರು. ಇತ್ತ ಹೊರಗೆ ವೋಟಿಂಗ್ ಲೈನ್ ಓಪನ್ ಆಗಿರದೇ ಇದ್ದಿದ್ದರಿಂದ ಈ ವಾರ ಯಾರೂ ಎಲಿಮಿನೇಟ್ ಆಗೋದಿಲ್ಲ ಅನ್ನೋದು ವೀಕ್ಷಕರಿಗೆ ಗೊತ್ತಿತ್ತು! ಇದು ಸ್ಪರ್ಧಿಗಳಿಗೆ ಗೊತ್ತಿರಲಿಲ್ಲ. ಹೀಗಿದ್ದರೂ ತ್ರಿವಿಕ್ರಮ್ ಅವರನ್ನು ಎಲಿಮಿನೇಟ್ ಮಾಡಿದ್ದಾರೆ ಬಿಗ್ ಬಾಸ್!
ಹೌದು, ವೋಟಿಂಗ್ ಲೈನ್ಸ್ ತೆರೆಯದೇ ಇರುವುದರಿಂದ ಈ ಯಾರನ್ನೂ ಎಲಿಮಿನೇಟ್ ಮಾಡಲು ಸಾಧ್ಯವಿಲ್ಲ. ಆದರೂ ತ್ರಿವಿಕ್ರಮ್ ಅವರನ್ನು ಎಲಿಮಿನೇಟ್ ಮಾಡಲಾಗಿದೆ, ರಣರೋಚಕ ಆಟಕ್ಕೆ ಚಾಲನೆ ನೀಡಲಾಗಿದೆ. ಅಲ್ಲದೆ, ಇದು ದೊಡ್ಡ ಅಚ್ಚರಿಗೆ ಕಾರಣವಾಗಿದೆ. ಮೋಕ್ಷಿತಾ ಪೈ, ಹನುಮಂತ, ರಜತ್ ಬುಜ್ಜಿ, ತ್ರಿವಿಕ್ರಮ್ ಈ ವಾರ ನಾಮಿನೇಟ್ ಆಗಿದ್ದರು. ತ್ರಿವಿಕ್ರಮ್ ತಾವಾಗಿಯೇ ನಾಮಿನೇಟ್ ಮಾಡಿಕೊಂಡು, ಕೊನೆಗೆ ಆ ಮಿಸ್ಟೇಕ್‌ಗೆ ಸುದೀಪ್ ಅವರ ಕಡೆಯಿಂದ ಕ್ಲಾಸ್ ಅನ್ನೂ ತೆಗೆದುಕೊಂಡಿದ್ದರು. ಐಶ್ವರ್ಯಾ ಅವರನ್ನು ನೇರವಾಗಿ ನಾಮಿನೇಟ್ ಮಾಡಲಾಗಿತ್ತು. ಅಂತಿಮವಾಗಿ ಉಳಿದವರು ಐಶ್ವರ್ಯಾ ಮತ್ತು ತ್ರಿವಿಕ್ರಮ್ ಮಾತ್ರ. ಅದರಲ್ಲಿ ಐಶೂ ಸೇಫ್ ಆದರೆ, ತ್ರಿವಿಕ್ರಮ್ ಎಲಿಮಿನೇಟ್ ಆದರು.
ಈ ಸೀಸನ್ ಅಲ್ಲಿ ಫೇಕ್ ಎಲಿಮಿನೇಷನ್‌ಗಳು ನಡೆದಿವೆ. ಭವ್ಯಾ ಗೌಡ ಇನ್ನೇನು ಎಲಿಮಿನೇಟ್ ಅನ್ನುವಾಗ ಅವರನ್ನು ವಾಪಸ್ ಕರೆದುಕೊಂಡಿದ್ದಾರೆ. ಮೋಕ್ಷಿತಾ ಕಾರಿನಲ್ಲಿ ಹೊರಗೆ ಹೋಗಿ, ಪುನಃ ಬಂದಿದ್ದಾರೆ. ಚೈತ್ರಾ ಕುಂದಾಪುರ ಕೂಡ ಎಲಿಮಿನೇಷನ್ ಹೆಸರಿನಲ್ಲಿ ಹೊರಗೆ ಹೋಗಿ, ಮರಳಿ ಬಂದಿದ್ದಾರೆ. ಆದರೆ ಅವರು ಯಾರು ಕೂಡ ಮುಖ್ಯದ್ವಾರದಿಂದ ಹೊರಗೆ ಹೋಗಿರಲಿಲ್ಲ. ಆದರೆ ತ್ರಿವಿಕ್ರಮ್ ಅವರನ್ನು ಮುಖ್ಯದ್ವಾರದಿಂದಲೇ ಹೊರಗೆ ಕಳಿಸಲಾಗಿದೆ.
ಲಗೇಜ್‌ ಸಮೇತ ಬಿಗ್ ಬಾಸ್ ಮನೆಯ ಮುಖ್ಯದ್ವಾರದ ಮೂಲಕ ತ್ರಿವಿಕ್ರಮ್ ಹೊರಗೆ ಹೋಗುತ್ತಿದ್ದಂತೆಯೇ, ಇತ್ತ ಸ್ಪರ್ಧಿಗಳು ಕಂಗಾಲಾದರು. ಭವ್ಯಾ ಗೌಡ ಬಿಕ್ಕಿ ಬಿಕ್ಕಿ ಅತ್ತರೇ, ಮೋಕ್ಷಿತಾ, ರಜತ್, ಮಂಜು ಮುಂತಾದವರು ಅಚ್ಚರಿ ಪಟ್ಟರು. ಸೀಕ್ರೆಟ್ ರೂಮ್‌ಗೆ ಕಳಿಸಿರಬಹುದಾ ಎಂದು ಧನರಾಜ್ ಆಲೋಚಿಸಿದರೆ, “ಸೀಕ್ರೆಟ್ ರೂಮ್‌ಗೆ ಕಳಿಸಿದರೆ ಮೇನ್‌ ಡೋರ್‌ನಿಂದ ಯಾರನ್ನೂ ಹೊರಗೆ ಕಳಿಸಲ್ಲ” ಅಂತ ಹನುಮಂತ ಲಾಜಿಕಲ್ ಪಾಯಿಂಟ್ ಇಟ್ಟರು. ಒಟ್ಟಿನಲ್ಲಿ ಬಿಗ್ ಬಾಸ್ ಎಲ್ಲಾ ಸ್ಪರ್ಧಿಗಳಿಗೂ ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ ತೋರಿಸ್ತಿರೋದಂತೂ ಪಕ್ಕಾ.
ಈ ಸೀಸನ್‌ನಿಂದ ಹೊಸದೊಂದು ಪರಿಪಾಠ ಆರಂಭವಾಗಿದೆ. ಅದೇನೆಂದರೆ, ಭಾನುವಾರದ ಸಂಚಿಕೆಯನ್ನು ಸೋಮವಾರದವರೆಗೂ ಮುಂದುವರಿಸುವುದು. ಡಿ.22 ರ ಸಂಚಿಕೆ ಕೂಡ ಸೋಮವಾರಕ್ಕೆ ಮುಂದುವರಿದಿದೆ. ಅದರ ಪ್ರೋಮೋವನ್ನು ಕೂಡ ತೋರಿಸಲಾಗಿದೆ. ಸುದೀಪ್ ಅವರು, “ಎಷ್ಟು ಮಂದಿಗೆ ತ್ರಿವಿಕ್ರಮ್ ಅವರು ಹೋಗಿದ್ದು ಅಚ್ಚರಿ ಮೂಡಿಸಿದೆ” ಎಂದೆಲ್ಲಾ ಪ್ರಶ್ನೆ ಮಾಡಿದ್ದಾರೆ. ಅದರರ್ಥ ಸೋಮವಾರದ ಸಂಚಿಕೆಯಲ್ಲಿ ಸುದೀಪ್ ಅವರು ಒಂದಷ್ಟು ಕ್ಲಾಸ್ ತೆಗೆದುಕೊಂಡ ಬಳಿಕ, ಪುನಃ ತ್ರಿವಿಕ್ರಮ್ ಅವರನ್ನು ವಾಪಸ್ ಮನೆಯೊಳಗೆ ಕಳಿಸುವ ಸಾಧ್ಯತೆ ಇದೆ. ಅಲ್ಲಿವರೆಗೂ ಕಾದುನೋಡಬೇಕು.
