Dharwad News: ಧಾರವಾಡ : ಧಾರವಾಡದ ಸೂಪರ್ ಮಾರ್ಕೇಟ್‌ನಲ್ಲಿ ಧರ್ಮದಂಗಲ್ ಶುರುವಾಗಿದ್ದು, ಒಂದೇ ಪ್ರದೇಶದಲ್ಲಿ ಎರಡು ಸಮುದಾಯದವರು ದೇವರ ಪ್ರತಿಷ್ಠಾಪನೆ ಮಾಡಿದ್ದಾರೆ.
ಈ ಮೂಲಕ ಸೂಪರ್ ಮಾರ್ಕೆಟ್ ನ ಪಾರ್ಕಿಂಗ್ ಜಾಗದಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಗಿದೆ. ಎರಡೂ ಸಮುದಾಯದ ಜನ ಜಮಾವಣೆಯಾಗಿದ್ದು, ಮಹಾನಗರ ಪಾಲಿಕೆ ಜಾಗದಲ್ಲಿ ಪ್ರಎರಡು ದೇವರನ್ನು ಪ್ರತಿಷ್ಠಾಪಿಸಲಾಗಿದೆ.
ಸುಮಾರು 50 ವರ್ಷಗಳ ಹಿಂದೆಯೇ, ಈ ಮರದ ಕೆಳಗೆ, ಹನುಮಂತ, ಕರಿಯಮ್ಮ ಮತ್ತು ನಾಗದೇವರನ್ನು ಇಲ್ಲಿ ಪ್ರತಿಷ್ಠಪಿಸಲಾಗಿದೆ. ಹಲವಾರು ವರ್ಷಗಳಿಂದಲೇ ಪೂಜೆಯನ್ನು ಮಾಡಿಕೊಂಡು ಬರಲಾಗಿದೆ. ಇದೀಗ ಈದ್‌ಮಿಲಾದ್ ಹಬ್ಬದಂದು, ಪಕ್ಕದ ಗಿಡದ ಕೆಳಗೆ ಮೆಹಬೂಬ ಸುಮಬಾನಿ ದರ್ಗಾದ ಕಲ್ಲನ್ನು ಪ್ರತಿಷ್ಠಾಪಿಸಲಾಗಿದೆ.
ಹೀಗಾಗಿ ಎರಡೂ ಧರ್ಮದವರ ನಡುವೆ, ಧರ್ಮದಂಗಲ್ ಶುರುವಾಗಿದ್ದು, ಹಲವಾರು ವರ್ಷಗಳಿಂದ ನಾವು ಹನುಮಂತನ ಪೂಜೆ ಮಾಡುತ್ತಿದ್ದೇವೆ, ಇತ್ತೀಚೆಗಷ್ಟೇ ಇವರು ತಮ್ಮ ಮತದ ದೇವರ ಕಲ್ಲು ಪ್ರತಿಷ್ಠಾಪಿಸಿದ್ದಾರೆಂದು ಆರೋಪಿಸಿದ್ದಾರೆ.
ಹೀಗಾಗಿ ಮಹಾನಗರ ಪಾಲಿಕೆ ಎರಡೂ ದೇವರ ತೆರವಿಗೆ ನಿರ್ಧರಿಸಿದೆ. ಆದರೆ ದೇವರನ್ನು ತೆರವುಗೊಳಿಸುವ ವಿಚಾರವಾಗಿ, ಸ್ಥಳೀಯರು ವಿರೋಧ ವ್ಯಕ್ತಪಡಿಸಿದ್ದಾರೆ. ಸ್ಥಳಕ್ಕೆ ಶಹರ ಠಾಣೆ ಪೊಲೀಸರು ಭೇಟಿ ನೀಡಿದ್ದು, ಸ್ಥಳದಲ್ಲಿ ಮುಂಜಾಗೃತಾ ಕ್ರಮವಾಗಿ ಬಿಗಿ ಪೊಲೀಸ್ ಬಂದೋಬಸ್ತ್ ಮಾಡಲಾಗಿದೆ.
