ರಾಜ್ಯಸಭಾ ಚುನಾವಣೆಯಲ್ಲಿ ಜಮ್ಮು ಮತ್ತು ಕಾಶ್ಮೀರದ ನ್ಯಾಷನಲ್ ಕಾನ್ಫರೆನ್ಸ್ ಜಯ ಸಾಧಿಸಿದೆ. 4 ಮೇಲ್ಮನೆ ಸ್ಥಾನಗಳಲ್ಲಿ ಮೂರು ಸ್ಥಾನಗಳನ್ನು ನ್ಯಾಷನಲ್ ಕಾನ್ಫರೆನ್ಸ್ ಗೆದ್ದರೆ, ಬಿಜೆಪಿ ಒಂದು ಸ್ಥಾನವನ್ನು ಪಡೆಯುವಷ್ಟೇ ತೃಪ್ತಿಯಾಗಿದೆ. 2019ರಲ್ಲಿ ಈ ಪ್ರದೇಶದ ರಾಜ್ಯ ಸ್ಥಾನಮಾನ ರದ್ದಾದ ನಂತರ, ಮೊದಲ ಬಾರಿಗೆ ನಡೆದ ಚುನಾವಣೆ ಇದಾಗಿತ್ತು. ಇದರಲ್ಲಿ ಎನ್‌ಸಿ ನೇತೃತ್ವದ ಮೈತ್ರಿಕೂಟ ಮತ್ತು ಬಿಜೆಪಿ ನಡುವೆ ತೀವ್ರ ಸ್ಪರ್ಧೆ ಏರ್ಪಟ್ಟಿತ್ತು.
ಹಿರಿಯ ಎನ್‌ಸಿ ನಾಯಕ ಚೌಧರಿ ಮೊಹಮ್ಮದ್ ರಂಜಾನ್ 58 ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದಾರೆ. ಸಜ್ಜದ್ ಕಿಚ್ಲೂ ಮತ್ತು ಶಮ್ಮಿ ಒಬೆರಾಯ್ ವಿಜಯ ಶಾಲಿಯಾಗಿದ್ದಾರೆ. ಬಿಜೆಪಿಯ ಸತ್ ಪಾಲ್ ಶರ್ಮಾ 32 ಮತಗಳೊಂದಿಗೆ ಗೆಲುವು ಪಡೆಯುವಲ್ಲಿ ಯಶಸ್ವಿಯಾದರು.
ಗುಲಾಮ್ ನಬಿ ಆಜಾದ್, ಮೀರ್ ಮೊಹಮ್ಮದ್ ಫಯಾಜ್, ಶಂಶೇರ್ ಸಿಂಗ್ ಮತ್ತು ನಜೀರ್ ಅಹ್ಮದ್ ಲಾವೇ ನಿವೃತ್ತಿಯ ನಂತರ, ಜಮ್ಮು ಕಾಶ್ಮೀರದ 4 ರಾಜ್ಯಸಭಾ ಸ್ಥಾನಗಳು ಫೆಬ್ರವರಿ 2021ರಿಂದ ಖಾಲಿಯಾಗಿ ಉಳಿದಿದ್ದವು. ಮುಂಬರುವ ಸಂಸತ್ತಿನ ಅಧಿವೇಶನದಲ್ಲಿ ಹೊಸ ರಾಜ್ಯಸಭಾ ಸದಸ್ಯರು ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ.
ಈ ಚುನಾವಣೆಯು ಜಮ್ಮು ಕಾಶ್ಮೀರದ ಪುನಃ ಸ್ಥಾಪನೆಯ ನಂತರ ರಾಜಕೀಯದಲ್ಲಿ ಮಹತ್ವದ ಮೈಲಿಗಲ್ಲಾಗಿದೆ. ಶ್ರೀನಗರದ ವಿಧಾನಸಭಾ ಸಂಕೀರ್ಣದಲ್ಲಿ 3 ಮತಗಟ್ಟೆಗಳಲ್ಲಿ ಮತದಾನ ಪ್ರಕ್ರಿಯೆ ನಡೆಸಲಾಗಿತ್ತು.
