ತುಮಕೂರಿನಲ್ಲಿ ಭೂಸ್ವಾಧೀನ ಪರಿಹಾರ ನೀಡದ ಪ್ರಕರಣದಲ್ಲಿ ವಿಶೇಷ ಭೂ ಸ್ವಾಧೀನ ಅಧಿಕಾರಿ ಕಚೇರಿಯನ್ನು ರೈತನೇ ಜಪ್ತಿ ಮಾಡಿರುವ ಘಟನೆ ಸ್ಥಳೀಯವಾಗಿ ಸಂಚಲನ ಮೂಡಿಸಿದೆ. ತುಮಕೂರು–ರಾಯದುರ್ಗ ಹಾಗೂ ತುಮಕೂರು–ದಾವಣಗೆರೆ ರೈಲ್ವೆ ಮಾರ್ಗಕ್ಕಾಗಿ ಕಾರ್ಯನಿರ್ವಹಿಸುತ್ತಿರುವ ಭೂಸ್ವಾಧೀನ ಅಧಿಕಾರಿಗಳ ಕಚೇರಿ, ಮಹಾತ್ಮ ಗಾಂಧಿ ಕ್ರೀಡಾಂಗಣದ ಒಳಗೆ ಕಾರ್ಯನಿರ್ವಹಿಸುತ್ತಿತ್ತು.
ತುಮಕೂರು ತಾಲ್ಲೂಕಿನ ಹರಿಯಪ್ಪನಹಳ್ಳಿ ಗ್ರಾಮಕ್ಕೆ ಸೇರಿದ ರೈತ ಚಿಕ್ಕವೀರಯ್ಯ ಅವರ 1 ಎಕರೆ 7 ಗುಂಟೆ ಭೂಮಿ ರೈಲ್ವೆ ಯೋಜನೆಗಾಗಿ ಸ್ವಾಧೀನಗೊಳ್ಳಲಾಗಿತ್ತು. ಸರ್ಕಾರಿ ಮೌಲ್ಯಾನುಸಾರ ರೈತನಿಗೆ 70 ಲಕ್ಷ ರೂ. ಪರಿಹಾರ ನೀಡಲಾಗಿತ್ತು. ಆದರೆ ಇದು ಮಾರುಕಟ್ಟೆ ಮೌಲ್ಯಕ್ಕೆ ಸರಿಯಲ್ಲ ಎಂದು ತಿಳಿದು, ರೈತ ಚಿಕ್ಕವೀರಯ್ಯ ತುಮಕೂರಿನ ಮೊದಲ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯಕ್ಕೆ ಮನವಿ ಸಲ್ಲಿಸಿದ್ದರು.
ನ್ಯಾಯಾಲಯ, ರೈತನ ಬೇಡಿಕೆಯನ್ನು ಸಮರ್ಥಿಸಿ, 1 ಕೋಟಿ 30 ಲಕ್ಷ ರೂ. ಹೆಚ್ಚುವರಿ ಪರಿಹಾರ ನೀಡುವಂತೆ ಆದೇಶಿಸಿತ್ತು. ಕೋರ್ಟ್ ನೀಡಿದ ಗಡುವಿನ ಮೂರು ತಿಂಗಳೊಳಗೆ ಹೆಚ್ಚಿನ ಪರಿಹಾರವನ್ನು ನೀಡದ ಕಾರಣ, ರೈತ ಅಮಲ್ಜಾರಿಗೆ ದೂರು ನೀಡಿ ಕಚೇರಿ ಜಪ್ತಿ ಮಾಡಲು ಆದೇಶ ಪಡೆದರು. ರೈತನ ದೂರು ಪರಿಶೀಲಿಸಿದ ನಂತರ, ಅಮಲ್ಜಾರಿ ಕಚೇರಿ ಜಪ್ತಿಗೆ ಮುಂದಾಯಿತು.
ಕೋರ್ಟ್ ಆದೇಶದಂತೆ, ರೈತ ಚಿಕ್ಕವೀರಯ್ಯ ಇಂದು ಲಾರಿಯನ್ನು ಕರೆಸಿ, ಭೂಸ್ವಾಧೀನ ಕಚೇರಿಯ ಪೀಠೋಪಕರಣ, ಕಚೇರಿ ಸಾಮಗ್ರಿಗಳನ್ನು ಜಪ್ತಿ ಮಾಡಿದರು. ಸಾಮಗ್ರಿ ಜಪ್ತಿ ನಂತರ, ಅಧಿಕಾರಿಗಳು ಕುಳಿತುಕೊಳ್ಳಲು ಕುರ್ಚಿಗಳೇ ಇಲ್ಲದ ಕಾರಣ ನಿಂತುಕೊಂಡೇ ಕೆಲಸ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಯಿತು.
ಕೋರ್ಟ್ ಆದೇಶವನ್ನು ಇಗ್ನೋರ್ ಮಾಡಿದ ಅಧಿಕಾರಿಗಳಿಗೆ, ರೈತ ಚಿಕ್ಕವೀರಯ್ಯ ನೀಡಿದ ಈ ಕಾನೂನು ಪಾಠ ಈಗ ಎಲ್ಲೆಡೆ ಚರ್ಚೆಯ ವಿಷಯವಾಗಿದೆ. ರೈತರ ನ್ಯಾಯಕ್ಕಾಗಿ ಹೋರಾಡುವ ಇದು ಹತ್ತಿರದ ಜನರಲ್ಲಿ ಮೆಚ್ಚುಗೆಯನ್ನು ಗಳಿಸಿದೆ.
About The Author
