Tech News: ಕೈಯಲ್ಲಿ ಒಂದೂವರೆ ಲಕ್ಷ ಬೆಲೆಯ ಲೇಟೆಸ್ಟ್ ಐಫೋನ್ ಇದ್ದರೂ, ದಟ್ಟ ಕಾಡಿನ ಕಡೆಗೋ, ನಡು ಸಮುದ್ರಕ್ಕೋ ಅಥವಾ ಗುಡ್ಡಗಾಡು ಪ್ರದೇಶಕ್ಕೋ ಹೋದರೆ ಅದೊಂದು ಬರೀ ‘ಡಬ್ಬಿ’ಯಾಗಿಬಿಡುತ್ತದೆ! ಏಕೆಂದರೆ ಅಲ್ಲಿ ಸಿಗ್ನಲ್ ನೀಡಲು ಮೊಬೈಲ್ ಟವರ್ಗಳೇ ಇರುವುದಿಲ್ಲ. ಆದರೆ, ಸರ್ಕಾರಿ ಸ್ವಾಮ್ಯದ ಟೆಲಿಕಾಂ ಸಂಸ್ಥೆ ಬಿಎಸ್ಎನ್ಎಲ್ ಇದೀಗ ಐಫೋನ್ಗಿಂತಲೂ ದುಬಾರಿಯಾದ ಹಾಗೂ ಎಲ್ಲಿ ಹೋದರೂ ನೆಟ್ವರ್ಕ್ ಕೈಕೊಡದ ವಿಶೇಷ ಫೋನ್ ಒಂದನ್ನು ಪರಿಚಯಿಸಿದೆ.
ಇದರ ಬೆಲೆ ಬರೋಬ್ಬರಿ 1,34,166 ರೂಪಾಯಿ . ಇದರಲ್ಲಿ ಹೈ-ಎಂಡ್ ಕ್ಯಾಮೆರಾಗಳಾಗಲಿ, ರೀಲ್ಸ್ ನೋಡುವ ಸೌಲಭ್ಯವಾಗಲಿ ಇಲ್ಲದಿದ್ದರೂ ಈ ಫೋನ್ ಇಷ್ಟು ದುಬಾರಿಯಾಗಿರಲು ಕಾರಣ, ಇದೊಂದು ಅತ್ಯಾಧುನಿಕ ‘ಸ್ಯಾಟಲೈಟ್ ಫೋನ್’. ಎಲ್ಲೆಲ್ಲಿ ಸಾಂಪ್ರದಾಯಿಕ ಮೊಬೈಲ್ ನೆಟ್ವರ್ಕ್ ಸಿಗುವುದಿಲ್ಲವೋ, ಅಂತಹ ಪ್ರದೇಶಗಳಲ್ಲಿ ಈ ಫೋನ್ ಉಪಗ್ರಹಗಳ ಮೂಲಕ ನೇರ ಸಂಪರ್ಕ ಕಲ್ಪಿಸುತ್ತದೆ.
ಹಣವಿದ್ದರೂ ಸಾಮಾನ್ಯರು ಖರೀದಿಸುವಂತಿಲ್ಲ!
ಹಣ ಕೊಟ್ಟರೆ ಈ ಫೋನ್ ಅನ್ನು ಯಾರು ಬೇಕಾದರೂ ಮಾರುಕಟ್ಟೆಯಲ್ಲಿ ಖರೀದಿಸುವಂತಿಲ್ಲ. ಭಾರತದಲ್ಲಿ ಸ್ಯಾಟಲೈಟ್ ಫೋನ್ಗಳ ಬಳಕೆಯ ಮೇಲೆ ಕಟ್ಟುನಿಟ್ಟಿನ ನಿರ್ಬಂಧಗಳಿವೆ. ಹೀಗಾಗಿ, ಈ ಫೋನ್ ಖರೀದಿಸಲು ಹಾಗೂ ಬಳಸಲು ಕೇಂದ್ರ ದೂರಸಂಪರ್ಕ ಇಲಾಖೆಯ ಕಡ್ಡಾಯ ಅನುಮತಿ ಪಡೆಯಲೇಬೇಕು. ಪೂರ್ವಾನುಮತಿ ಇಲ್ಲದೆ ಸ್ಯಾಟಲೈಟ್ ಫೋನ್ ಹೊಂದುವುದು ಅಥವಾ ಬಳಸುವುದು ಭಾರತೀಯ ಕಾನೂನಿನ ಪ್ರಕಾರ ಅಪರಾಧವಾಗಿದೆ.
ಇದು ಹೇಗೆ ಕೆಲಸ ಮಾಡುತ್ತದೆ?
ನಾವು ಬಳಸುವ ಸಾಮಾನ್ಯ ಫೋನ್ಗಳು ಹತ್ತಿರದ ಮೊಬೈಲ್ ಟವರ್ಗಳನ್ನು ಅವಲಂಬಿಸಿರುತ್ತವೆ. ಆದರೆ ಬಿಎಸ್ಎನ್ಎಲ್ನ ಈ ಹೊಸ ಫೋನ್ ಭೂಮಿಯ ಕಕ್ಷೆಯಲ್ಲಿರುವ ಉಪಗ್ರಹಗಳಿಗೆ ನೇರವಾಗಿ ಕನೆಕ್ಟ್ ಆಗುತ್ತದೆ. ಜಾಗತಿಕ ಸ್ಯಾಟಲೈಟ್ ನೆಟ್ವರ್ಕ್ ಪೂರೈಕೆದಾರ ಸಂಸ್ಥೆಯಾದ ‘ಇನ್ಮಾರ್ಸ್ಯಾಟ್’ ಸಹಯೋಗದೊಂದಿಗೆ ಬಿಎಸ್ಎನ್ಎಲ್ ಈ ಸೇವೆಯನ್ನು ಅಭಿವೃದ್ಧಿಪಡಿಸಿದೆ. ಯಾವುದೇ ಮೂಲಭೂತ ಸೌಕರ್ಯಗಳಿಲ್ಲದ ಪ್ರದೇಶಗಳಲ್ಲಿ ಧ್ವನಿ ಕರೆ (ವಾಯ್ಸ್ ಕಾಲ್) ಮಾಡಲು ಇದು ಸಹಕಾರಿಯಾಗಿದೆ.
ಯಾರಿಗೆ ಇದು ಹೆಚ್ಚು ಉಪಯುಕ್ತ?
ದೈನಂದಿನ ಬಳಕೆದಾರರಿಗಿಂತ ಹೆಚ್ಚಾಗಿ, ಕಠಿಣ ಪರಿಸ್ಥಿತಿಗಳಲ್ಲಿ ಕೆಲಸ ಮಾಡುವವರಿಗಾಗಿ ಇದನ್ನು ವಿನ್ಯಾಸಗೊಳಿಸಲಾಗಿದೆ.
ರಕ್ಷಣಾ ಪಡೆಗಳು
ಕಡಲ ಕಾರ್ಯಾಚರಣೆಗಳು
ವಿಪತ್ತು ನಿರ್ವಹಣಾ ತಂಡಗಳು
ಗಣಿಗಾರಿಕೆ ವಲಯ
ನಿರ್ಜನ ಪ್ರದೇಶಗಳಲ್ಲಿ ಸಂಚರಿಸುವ ಚಾರಣಿಗರು ಹಾಗೂ ಯಾತ್ರಾರ್ಥಿಗಳು.
BSNL ಸ್ಯಾಟಲೈಟ್ ಫೋನ್ನ ಪ್ರಮುಖ ಫೀಚರ್ಸ್
ಮೊಬೈಲ್ ನೆಟ್ವರ್ಕ್ ಇಲ್ಲದ ಜಾಗದಲ್ಲೂ ಸ್ಯಾಟಲೈಟ್ ಮೂಲಕ ಸಂಪರ್ಕ.
ತುರ್ತು ಸಂದರ್ಭಗಳಲ್ಲಿ ಸಹಾಯ ಕೋರಲು ‘SOS ಎಮರ್ಜೆನ್ಸಿ’ ಸೌಲಭ್ಯ.
ವಿದ್ಯುತ್ ಸಂಪರ್ಕವಿಲ್ಲದ ಜಾಗದಲ್ಲೂ ದಿನಗಟ್ಟಲೆ ಬಾಳಿಕೆ ಬರುವ ಶಕ್ತಿಶಾಲಿ ಬ್ಯಾಟರಿ.
ಎಂತಹ ಕಠಿಣ ಹವಾಮಾನವನ್ನೂ ತಡೆದುಕೊಳ್ಳಬಲ್ಲ ರಗಡ್ ವಿನ್ಯಾಸ.
ಖರೀದಿ ಹಾಗೂ ಹೆಚ್ಚಿನ ಮಾಹಿತಿ
ಈ ಮಿಷನ್-ಕ್ರಿಟಿಕಲ್ ಡಿವೈಸ್ ಖರೀದಿಸಲು ಇಚ್ಛಿಸುವ ಸಂಸ್ಥೆಗಳು ಅಥವಾ ವ್ಯಕ್ತಿಗಳು ದೂರಸಂಪರ್ಕ ಇಲಾಖೆಯ ಅನುಮತಿ ಪಡೆದ ಬಳಿಕ ಹತ್ತಿರದ BSNL ಕಚೇರಿಯನ್ನು ಸಂಪರ್ಕಿಸಬಹುದು. ಹೆಚ್ಚಿನ ಮಾಹಿತಿಗಾಗಿ 9768866652 ಸಂಖ್ಯೆಗೆ ಕರೆ ಮಾಡಬಹುದು.
ದೇಶಾದ್ಯಂತ 4G ವಿಸ್ತರಣೆಯಲ್ಲಿ BSNL
ಒಂದೆಡೆ ಸ್ಯಾಟಲೈಟ್ ಫೋನ್ ಪರಿಚಯಿಸಿರುವ ಬಿಎಸ್ಎನ್ಎಲ್, ಮತ್ತೊಂದೆಡೆ ತನ್ನ 4G ನೆಟ್ವರ್ಕ್ ಅನ್ನು ವೇಗವಾಗಿ ವಿಸ್ತರಿಸುತ್ತಿದೆ. ದೇಶಾದ್ಯಂತ ಈಗಾಗಲೇ ಸುಮಾರು 99,000 4G ಟವರ್ಗಳನ್ನು ಅಳವಡಿಸಲಾಗಿದ್ದು, ಸರ್ಕಾರವು ಬಿಎಸ್ಎನ್ಎಲ್ಗೆ ಇನ್ನಷ್ಟು 4G ಸೈಟ್ಗಳನ್ನು ಸ್ಥಾಪಿಸಲು ಒಪ್ಪಿಗೆ ನೀಡುವ ಚಿಂತನೆಯಲ್ಲಿದೆ.
About The Author
