ಚಂದನವನದ ಚಿತ್ತಾರದ ಗೊಂಬೆ, ಗೋಲ್ಡನ್ ಕ್ವೀನ್ ನಟಿ ಅಮೂಲ್ಯ ಈಗ ತಮ್ಮ ಮಕ್ಕಳೊಂದಿಗೆ ಅತ್ಯಮೂಲ್ಯ ಸಮಯವನ್ನ ಕಳೆಯುತ್ತಿದ್ದಾರೆ. ಅವಳಿ ಜವಳಿ ಗಂಡು ಮಕ್ಕಳಿಗೆ ಜನ್ಮ ನೀಡಿರೋ ಅಮೂಲ್ಯ ಸದ್ಯ ಮಕ್ಕಳ ಲಾಲನೆ ಪಾಲನೆಯಲ್ಲಿ ಬ್ಯುಸಿಯಾಗಿದ್ದಾರೆ.
ಈ ನಡುವೆ ತಮ್ಮ ಮಕ್ಕಳಿಗೆ ಎರಡು ತಿಂಗಳು ತುಂಬಿದ ಖುಷಿಯಲ್ಲಿ ಒಂದು ಭಾವುಕ ಪೋಸ್ಟ್ ನ ತಮ್ಮ ಇನ್ಸ್ಟಾಗ್ರಾಂ ಪೇಜ್‌ನಲ್ಲಿ ಅಭಿಮಾನಿಗಳ ಜೊತೆ ಹಂಚಿಕೊಂಡಿದ್ದಾರೆ.
“ತಾಯ್ತನದ ಸoಭ್ರಮಕ್ಕೆ ಇಂದು 2 ತಿಂಗಳು..ನಿಜವಾಗಿಯೂ ಇದು ನನ್ನ ಜೀವನದಲ್ಲಿ ಬಹು ನಿರೀಕ್ಷಿತ ಜರ್ನಿ ಅಂತ ಹೇಳಬಹುದು. ನಾನು ಅವಳಿ ಮಕ್ಕಳಿಗೆ ತಾಯಿ ಆಗುತ್ತಿದ್ದೇನೆ ಅಂತ ನನಗೆ ವಿಷಯ ತಿಳಿದಾಗ ನನಗಾಗ ಸಂತೋಷ ಅಷ್ಟಿಷ್ಟಲ್ಲ. ಇದಕ್ಕಿಂತ ಖುಷಿ ನನಗೆ ಬೇರೊಂದಿಲ್ಲ. ಗರ್ಭದಲ್ಲಿದ್ದ ಮಕ್ಕಳ ಒದೆತಗಳು ನನ್ನ ಎಲ್ಲಾ ಸವಾಲುಗಳನ್ನ ಮರೆಸುತ್ತಿದ್ದವು. ಈಗಾಗಲೇ ನಾನು ನನ್ನ ಬೇಬಿ ಬಂಪ್‌ನ ತುಂಬಾ ಮಿಸ್ ಮಾಡಿಕೊಳ್ತಿದ್ದೇನೆ.
ಆದರೆ, ಪ್ರತಿಯೊಬ್ಬ ತಾಯಿಯೂ ಜಗತ್ತಿಗೆ ತನ್ನ ಕೆಚ್ಚೆದೆಯ ಮುಖವನ್ನು ತೋರಿಸುತ್ತಾಳೆ. ಆದರೆ, ಈ ಗರ್ಭಾವಸ್ಥೆಯ ಪಯಣದಲ್ಲಿನ ಗುಲಾಬಿಗಳು ಮತ್ತು ಮುಳ್ಳುಗಳು ತಾಯಿಗೆ ಮಾತ್ರ ತಿಳಿದಿದೆ ಎಂಬುದನ್ನು ನಾನು ಹೇಳಲೇಬೇಕು” ಎಷ್ಟೆಲ್ಲಾ ಕಷ್ಟವಾದರೂ, ಕೊನೆಯಲ್ಲಿ ನಾನು ನನ್ನ ಮಕ್ಕಳ ಪುಟ್ಟ ಪುಟ್ಟ ಪಾದಗಳನ್ನು ನೋಡಿದಾಗ ಅಥವಾ ಅವರ ಕೈಗಳನ್ನು ಹಿಡಿದಾಗ, ನಾನು ನನ್ನ ಕೈಲಾದಷ್ಟು ಮಾಡಿದ್ದೇನೆ ಮತ್ತು ಅದನ್ನು ಮುಂದುವರಿಸುತ್ತೇನೆ ಎಂಬುದು ನನಗೆ ಗೊತ್ತಾಗುತ್ತದೆ”
ಹೀಗಂತ ನಟಿ ಅಮೂಲ್ಯ ಸೋಶಿಯಲ್ ಮೀಡಿಯಾದಲ್ಲಿ ಪತಿ ಜಗದೀಶ್ ಜೊತೆ ಪೋಸ್ ಕೊಟ್ಟಿರೋ ಬೇಬಿ ಬಂಪ್ ಫೋಟೋಶೂಟ್ ಹಂಚಿಕೊಳ್ಳುವದರ ಜೊತೆಗೆ ತಮ್ಮ ತಾಯ್ತನದ ಭಾವನೆಯನ್ನ ಮನಸಾರೆ ಹೇಳಿಕೊಂಡಿದ್ದಾರೆ.
ನಳಿನಾಕ್ಷಿ, ಕರ್ನಾಟಕ ಟಿವಿ
