Health Tips: ಮೊಳಕೆ ಕಾಳುಗಳು ಆರೋಗ್ಯಕ್ಕೆ ಅದೆಷ್ಟು ಉತ್ತಮ ಅನ್ನೋದು ಎಲ್ಲರಿಗೂ ಗೊತ್ತು. ಆದರೆ ಅದನ್ನು ಸೇವಿಸುವವರ ಸಂಖ್ಯೆ ಮಾತ್ರ ವಿರಳ. ಆದರೆ ನೀವು ಮೊಳಕೆ ಬರಿಸಿದ ಹೆಸರು ಕಾಳಿನ ಸೇವನೆ ಮಾಡಿದ್ದಲ್ಲಿ, ನಿಮ್ಮ ಆರೋಗ್ಯದಲ್ಲಿ ಅತ್ಯದ್ಭುತ ಬದಲಾವಣೆ ಕಾಣಬಹುದು. ಹಾಗಾದ್ರೆ ಮೊಳಕೆ ಬರಿಸಿದ ಹೆಸರು ಕಾಳುಗಳ ಸೇವನೆ ಮಾಡುವುದರಿಂದ ಆರೋಗ್ಯಕ್ಕಾಗುವ ಲಾಭಗಳೇನು ಅಂತಾ ತಿಳಿಯೋಣ ಬನ್ನಿ..
ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಕೊಂಚ ಮೊಳಕೆ ಬರಿಸಿದ ಹೆಸರು ಕಾಳು ಸೇವನೆ ಮಾಡುವುದರಿಂದ ಜೀರ್ಣಕ್ರಿಯೆ ಸಮಸ್ಯೆ ಕಡಿಮೆಯಾಗುತ್ತದೆ. ಅಲ್ಲದೇ, ತಿಂದ ಆಹಾರ ಚೆನ್ನಾಗಿ ಜೀರ್ಣವಾಗಿ, ಮಲಬದ್ಧತೆ ಸಮಸ್ಯೆಗೆ ಮುಕ್ತಿ ಸಿಗುತ್ತದೆ.
ಇದರ ಸೇವನೆಯಿಂದ ಆರೋಗ್ಯವಾಗಿ ನೀವು ದೇಹದ ತೂಕವನ್ನು ಹೆಚ್ಚಿಸಿಕೊಳ್ಳಬಹುದು. ಪ್ರತಿದಿನ ಬೆಳಿಗ್ಗೆ ನೆನೆಸಿಟ್ಟ ಹೆಸರು ಕಾಳನ್ನು ನಿಮ್ಮ ಮನೆಯಲ್ಲಿರುವ, ತಿನ್ನಲು ಯೋಗ್ಯವಾದ ಹಲ್ಲುಗಳನ್ನು ಹೊಂದಿರುವ ಮಕ್ಕಳಿಗೆ ನೀಡಿದರೆ, ಅವರ ದೇಹದ ತೂಕವನ್ನು ಆರೋಗ್ಯಕರವಾಗಿ ಹೆಚ್ಚಿಸಬಹುದು.
ನೀವು ಬರೀ ನೆನೆಸಿದ ಹೆಸರು ಕಾಳಿನ ಸೇವನೆಯಿಂದ ದೇಹದ ತೂಕವನ್ನು ಹೆಚ್ಚು ಮಾಡಿಕೊಳ್ಳಬಹುದು. ಜೊತೆಗೆ ಮೊಳಕೆ ಬರಿಸಿದ ಹೆಸರು ಕಾಳಿನ ಸೇವನೆಯಿಂದ ದೇಹದ ತೂಕ ಇಳಿಸಿಕೊಳ್ಳಬಹುದು. ಅಲ್ಲದೇ ನಿಮ್ಮ ಮೂಳೆಯ ಶಕ್ತಿ ಹೆಚ್ಚಿಸಲು ಕೂಡ ಹೆಸರು ಕಾಳು ಸಹಕಾರಿಯಾಗಿದೆ.
ಇದರ ಸೇವನೆಯಿಂದ ದೇಹದಲ್ಲಿರುವ ಕೆಟ್ಟ ಕೊಬ್ಬು ಕರಗುತ್ತದೆ. ಆಗ ರಕ್ತನಾಳದಲ್ಲಿ ರಕ್ತದ ಸಂಚಾರ ಉತ್ತಮವಾಗುತ್ತದೆ. ಹೀಗಾದಾಗ, ನಿಮ್ಮ ಹೃದಯದ ಆರೋಗ್ಯ ಉತ್ತಮವಾಗಿರುತ್ತದೆ. ಅಲ್ಲದೇ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿಯೂ ಇದು ಸಹಕಾರಿಯಾಗಿದೆ.
ನಿಮ್ಮ ಮುಖದಲ್ಲಿ ಹೊಳಪಿಲ್ಲ. ಸ್ಕಿನ್ ಡಲ್ ಆಗಿದೆ. ಕೂದಲಲ್ಲಿ ಹೊಳಪಿಲ್ಲ, ಕೂದಲು ಉದುರುತ್ತಿದೆ ಎಂದರೆ, ಈ ಎರಡೂ ಸಮಸ್ಯೆಗೆ ಇರುವ ಒಂದೇ ಪರಿಹಾರ ಅಂದ್ರೆ, ಅದು ನೆನೆಸಿಟ್ಟ ಹೆಸರು ಕಾಳಿನ ಸೇವನೆ. ನಿಮಗೆ ಬರೀ ಹೆಸರು ಕಾಳು ಸೇವಿಸಲು ರುಚಿಸುತ್ತಿಲ್ಲವೆಂದಲ್ಲಿ, ನೀವು ಇದಕ್ಕೆ ತುರಿದ ಸೌತೇಕಾಯಿ, ಕ್ಯಾರೇಟ್ ತುರಿ, ಕೊಬ್ಬರಿ ತುರಿ, ಆ್ಯಪಲ್, ದಾಳಿಂಬೆ ಸೇರಿಸಿ, ಕೊಂಚ ಉಪ್ಪು ಹಾಕಿ ಮಿಕ್ಸ್ ಮಾಡಿ, ಸಲಾಡ್ ರೀತಿ ಮಾಡಿಯೂ ಸೇವಿಸಬಹುದು.
