ಬಿಹಾರ ವಿಧಾನಸಭಾ ಚುನಾವಣೆಯ 2ನೇ ಹಂತದ ಮತದಾನ, ಇದೇ ನವೆಂಬರ್ 11ರಂದು ನಡೆಯಲಿದೆ. ನವೆಂಬರ್ 14ರಂದು ಫಲಿತಾಂಶ ಪ್ರಕಟವಾಗಲಿದೆ. ಈ ಮಧ್ಯೆ ಎರಡನೇ ಹಂತದ ಚುನಾವಣೆ ಮುಗಿದ ಬೆನ್ನಲ್ಲೇ ಎಕ್ಸಿಟ್ ಪೋಲ್ ಹೊರಬೀಳಲಿದೆ.
ಮೊದಲ ಹಂತದಲ್ಲಿ ನಡೆದ 121 ಕ್ಷೇತ್ರಗಳಲ್ಲಿ ಶೇಕಡಾ 64.66 ಮತದಾನವಾಗಿದೆ. ಇದುವರೆಗೆ ಹಲವು ಸಮೀಕ್ಷೆಗಳು ಹೊರಬಿದ್ದಿವೆ. ಈ ಸರ್ವೇಗಳ ಪ್ರಕಾರ, ಬಿಹಾರದ ಮತದಾರರು ಹೊಸ ಪ್ರಯೋಗಕ್ಕೆ ಮುಂದಾಗುವ ಮನಸ್ಥಿತಿಯಲ್ಲಿಲ್ಲ. ಪ್ರಧಾನಿ ನರೇಂದ್ರ ಮೋದಿಯವರ ಜನಪ್ರಿಯತೆ, ಎನ್ಡಿಎ ಮೈತ್ರಿಕೂಟವನ್ನು ದಡ ಸೇರಿಸಲಿದೆ. ಆದರೆ, ಲೋಕ್ ಪೋಲ್ ನಡೆಸಿದ್ದ ಸಮೀಕ್ಷೆ ಇದಕ್ಕೆ ವ್ಯತಿರಿಕ್ತವಾದ ಫಲಿತಾಂಶವನ್ನು ನೀಡಿದೆ.
ians – ಮ್ಯಾಟ್ರಿಜ್, ಪೋಲ್ ಸ್ಟ್ರಾಟ್ ಮತ್ತು ಚಾಣಕ್ಯ ಬಿಡುಗಡೆ ಮಾಡಿದ್ದ ಫಲಿತಾಂಶದ ಪ್ರಕಾರ, ಬಿಜೆಪಿ – ಜೆಡಿಯು ನೇತೃತ್ವದ ಎನ್ಡಿಎ ಮೈತ್ರಿಕೂಟ ಅಧಿಕಾರ ಉಳಿಸಿಕೊಳ್ಳಲಿದೆ ಎಂದು ಹೇಳಿದ್ದವು. ಆದರೆ, ಲೋಕ್ ಪೋಲ್, ಸಮೀಕ್ಷೆಯ ಪ್ರಕಾರ, ಅತಂತ್ರ ಫಲಿತಾಂಶ ಬರಲಿದೆ.
ಲೋಕ್ ಪೋಲ್ ಸಮೀಕ್ಷೆಯ ಪ್ರಕಾರ ಯಾರಿಗೆ ಎಷ್ಟು ವೋಟ್ ಶೇರ್ ಅನ್ನೋದನ್ನ ನೋಡೋದಾದ್ರೆ, ಎನ್ಡಿಎ ಮೈತ್ರಿಕೂಟಕ್ಕೆ ಶೇಕಡ 38ರಿಂದ 41 ಅಂದ್ರೆ 105 ರಿಂದ 114 ಸ್ಥಾನ, ಮಹಾಘಟಬಂಧನ್ ಮೈತ್ರಿಕೂಟಕ್ಕೆ ಶೇಕಡ 39ರಿಂದ 42 ಅಂದ್ರೆ 118ರಿಂದ 126 ಸ್ಥಾನ, ಇತರರು ಶೇಕಡ 12ರಿಂದ 16 ಅಂದ್ರೆ 2ರಿಂದ 5 ಸ್ಥಾನ ಗೆಲ್ಲಬಹುದೆಂದು ಹೇಳಿದೆ.
243 ಸದಸ್ಯ ಬಲದ ಬಿಹಾರ ಅಸೆಂಬ್ಲಿಯಲ್ಲಿ ಸರಳ ಬಹುಮತಕ್ಕೆ 122 ಸ್ಥಾನಗಳು ಬೇಕು. ಹಿಂದಿನ ಮೂರು ಸಮೀಕ್ಷೆಗಳ ಸರಾಸರಿಯನ್ನು ನೋಡಿದರೆ ಎನ್ಡಿಎ ಮೈತ್ರಿಕೂಟ 133ರಿಂದ 143 ಸ್ಥಾನವನ್ನು ಗೆಲ್ಲಬಹುದು. ಮಹಾಘಟಬಂಧನ್ 93ರಿಂದ 102 ಸ್ಥಾನವನ್ನು ಗೆಲ್ಲಬಹುದು.
ಈ ಸಮೀಕ್ಷೆಗಳನ್ನು ಆಧರಿಸಿ ಹೇಳುವುದಾದರ, ತೇಜಸ್ವಿ ಯಾದವ್ ಅವರ ಮುಖ್ಯಮಂತ್ರಿ ಹುದ್ದೆಗೇರುವ ಕನಸು ಮತ್ತೆ ಕನಸಾಗಿಯೇ ಉಳಿಯಲಿದೆ. ಬಿಹಾರದ ಸೋಲಿಗೆ, ಈಗಲೇ ಮಹಾಘಟಬಂಧನ್ ನಾಯಕರು ಪ್ರಾಕ್ಟೀಸ್ ಮಾಡಿಕೊಳ್ಳುತ್ತಿದ್ದಾರೆ ಎಂದು ಬಿಹಾರದ ಚುನಾವಣಾ ಪ್ರಚಾರದಲ್ಲಿ ಪ್ರಧಾನಿ ಮೋದಿ ಕೂಡ ಲೇವಡಿ ಮಾಡಿದ್ದರು.
