Special News : ನಾರಿ ಶಕ್ತಿ ವಂದನಾ. ಭಾರತದಲ್ಲಿ ಹೊಸ ಚರಿತ್ರೆ ಸೃಷ್ಟಿಸಿದ ವಿಧೇಯಕ ಇದು. ವಿಧಾನಸಭೆ,ಲೋಕಸಭೆ ಸೇರಿ ಶಾಸನ ಸಭೆಗಳಲ್ಲಿ ಶೇಕಡಾ 33 ರಷ್ಟು ಮಹಿಳಾ ಪ್ರಾತಿನಿಧ್ಯಕ್ಕೆ ಅಸ್ತು ಸೂಚಿಸಿರೊ ವಿಧೇಯಕ ಹೊಸ ಸಂಸತ್ತಿನಲ್ಲಿ ಮಂಡನೆ ಆಗಿದೆ. ರಾಷ್ಟ್ರಪತಿ ಅಂಕಿತ ಬಿದ್ದರೆ ಮುಂದಿನ 15 ವರ್ಷ ಶೇಕಡಾ 33 ರ ಮೀಸಲಿನಲ್ಲಿ ಯಾವುದೇ ಬದಲಾವಣೆ ಆಗದು. ಇದು 33 ರಷ್ಟು ಮೀಸಲಾತಿ ವಿಚಾರವಾದ್ರೆ, ಹಾಗಾದರೆ ಶೇಕಡಾ 50 ರಷ್ಟು ಮೀಸಲು ಹೊಂದಲು ಭಾರತೀಯ ನಾರಿಗೆ ಇನ್ನೆಷ್ಟು ವರ್ಷ ಬೇಕು.? ಸದ್ಯ ಈ ವಿಚಾರ ದೇಶಾದ್ಯಂತ ಚರ್ಚೆಗೆ ನಾಂಡಿ ಹಾಡಿದೆ..
ಪುರುಷರಿಗೆ ಮಹಿಳೆ ಎಲ್ಲ ರೀತಿಯಿಂದಲೂ ಸರಿಸಮಾನ ಎನ್ನುವಂಥ ಕಾಲ ಇದು. ಮನೆಯ ಸಂಸಾರದಿಂದ ಹಿಡಿದು ಕಚೇರಿವರೆಗೂ ಮಹಿಳೆಯರ ಒಲವು- ನಿಲುವುಗಳಿಗೆ ಪುರುಷರಷ್ಟೇ ಸಮಾನ ಆದ್ಯತೆ ಸಿಗುತ್ತಿದೆ. ಭಾರತ ಇವತ್ತು ಮಂಗಳಯಾನ, ಚಂದ್ರಯಾನದಂಥ ಸಾಧನೆ ಮೆರೆದಾಗಲೂ ಅದರ ಯಶಸ್ಸಿನ ಹಿಂದೆ ಮಹಿಳೆಯರ ಪಾತ್ರ ನಿರ್ಣಾಯಕ.ಆದರೂ, ರಾಜಕೀಯ ರಂಗದಲ್ಲಿ ಮಹಿಳೆಯರ ಪ್ರಾತಿನಿಧ್ಯ ಶೇಕಡಾ 33 ತಲುಪುವ ನಿಟ್ಟಿನಲ್ಲಿ ಭಾರತ ಈಗ ತಾನೆ ಹೆಜ್ಜೆ ಇಡುತ್ತಿದೆ. ಕೇವಲ ಭಾರತವೊಂದೇ ಅಲ್ಲ, ಜಗತ್ತಿನ ಬಹುತೇಕ ರಾಷ್ಟ್ರಗಳಲ್ಲಿ ಮಹಿಳಾ ಪ್ರಾತಿನಿಧ್ಯ ತೀವ್ರ ಚರ್ಚೆಗೀಡು ಮಾಡಿದಂಥ ಸಂಗತಿ.
ಜಗತ್ತಿನಲ್ಲಿ ಮಹಿಳೆಯು ಪುರುಷನಿಗೆ ಸಮಾನವಾಗಿ ಶೇ.50 ರಷ್ಟು ಪ್ರಾತಿನಿಧ್ಯ ಪಡೆಯಲು ಇನ್ನೆಷ್ಟು ಕಾಲ ಬೇಕು.? 15 ವರ್ಷ, 30 ವರ್ಷ? ಇಷ್ಟು ಕಿರು ಅವಧಿ ಖಂಡಿತಾ ಅಲ್ಲ ಎನ್ನುತ್ತಿದೆ ವಿಶ್ವಸಂಸ್ಥೆಯ ವರದಿ. 2023ರ ಜನವರಿ 1ರವರೆಗಿನ ವರದಿ ಪ್ರಕಾರ, ಜಗತ್ತಿನ 31 ರಾಷ್ಟ್ರಗಳಲ್ಲಿ, 34 ಮಹಿಳೆಯರು ಮಾತ್ರವೇ ಸರಕಾರದ ಮುಖ್ಯಸ್ಥರಾಗಿದ್ದಾರೆ. ಲಿಂಗ ಸಮಾನತೆಯ ದೃಷ್ಟಿಯಿಂದ ನೋಡಿದರೆ, ಮಹಿಳೆಯರು ಪುರುಷರಿಗೆ ಸಮಾನರಾಗಲು ಇನ್ನೂ 130 ವರ್ಷಗಳು ಬೇಕು ಅನ್ನುತ್ತೆ ವಿಶ್ವಸಂಸ್ಥೆ..
ಯೆಸ್, ಈಗ ಜಗತ್ತಿನಲ್ಲಿ ಶೇ.50 ಪ್ರಾತಿನಿಧ್ಯ ನೀಡಿರುವಂಥ ರಾಷ್ಟ್ರಗಳು ಕೇವಲ 13 ಮಾತ್ರ.. ಪ್ರಸ್ತುತ, ಭಾರತದ ಲೋಕಸಭೆಯಲ್ಲಿ ಶೇ.15.2, ರಾಜ್ಯಸಭೆಯಲ್ಲಿ ಶೇ.13.8 ರಷ್ಟು ಮಾತ್ರವೇ ಮಹಿಳೆಯರಿದ್ದಾರೆ. ಮಹಿಳಾ ಪ್ರಾತಿನಿಧ್ಯ ವಿಚಾರದಲ್ಲಿ ಭಾರತವು ಜಗತ್ತಿನಲ್ಲಿ 148 ನೇ ಸ್ಥಾನದಲ್ಲಿದ್ದು, ಪ್ರತಿವರ್ಷ ಈ ಸಂಬಂಧಿತವಾಗಿ ಶೇ.0.4 ರಷ್ಟು ಪ್ರಗತಿಯನ್ನಷ್ಟೇ ಕಾಣುತ್ತಿದೆ. ಭಾರತ ಇದೇ ಆಮೆಗತಿಯಲ್ಲಿ ಸಾಗಿದರೆ ಸಂಸತ್ತಿನ ಪ್ರಾತಿನಿಧ್ಯ ಕ್ಷೇತ್ರದಲ್ಲಿ ಲಿಂಗ ಸಮಾನತೆಯನ್ನು 2063ಕ್ಕಿಂತಲೂ ಮೊದಲು ಸಾಧಿಸಲು ಸಾಧ್ಯವಿಲ್ಲ ಅಂತಾರೆ ವಿಶ್ಲೇಷಕರು..
ಇದು ನಿಜಕ್ಕೂ ಕೂಡ ಭಾರತೀಯರು ನಾಚಿಕೆ ಪಡಬೇಕಾದ ವಿಚಾರ. ಜಗತ್ತಿನ ಎಲ್ಲ ಸಂಸತ್ತುಗಳಲ್ಲಿ ಮಹಿಳೆಯರ ಸಂಖ್ಯೆ ಕೇವಲ ಶೇಕಡಾ 25. ಕೇವಲ 4 ದೇಶಗಳು ಮಾತ್ರ ತಮ್ಮ ಸಂಸತ್ತಿನಲ್ಲಿ ಶೇಕಡಾ 50 ಕ್ಕಿಂತ ಹೆಚ್ಚಿನ ಮಹಿಳಾ ಪ್ರತಿನಿಧಿಗಳನ್ನು ಹೊಂದಿದೆ. ಅದರಲ್ಲಿ ರವಾಂಡಾದಲ್ಲಿ ಶೇಕಾ 61%, ಕ್ಯೂಬಾ ಶೇ.- 53%, ಬೊಲಿವಿಯಾ- ಶೇ 53%, ಯುಎಇ- ಶೇ. 50% ರಷ್ಟು ಮಹಿಳಾ ಪ್ರತಿನಿಧಿಗಳಿದ್ದಾರೆ. ಸಂಸತ್ತಿನಲ್ಲಿ ಮಹಿಳಾ ಪ್ರಾತಿನಿಧ್ಯದ ವಿಷಯದಲ್ಲಿ ಭಾರತವು ವಿಶ್ವದ 198 ದೇಶಗಳ ಪೈಕಿ 148ನೇ ಸ್ಥಾನದಲ್ಲಿದೆ.. ಚೀನಾ- 46, ಬಾಂಗ್ಲಾದೇಶ- 111, ಪಾಕಿಸ್ತಾನ- 116ನೇ ಸ್ಥಾನದಲ್ಲಿದೆ.
ಪಾಕಿಸ್ತಾನದ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ಮಹಿಳೆಯರಿಗೆ ಒಟ್ಟು 60 ಸ್ಥಾನಗಳು, ಬಾಂಗ್ಲಾದೇಶದ ಸಂಸತ್ತಿನಲ್ಲಿ ಮಹಿಳಾ ಸದಸ್ಯರಿಗೆ ಒಟ್ಟು 50 ಸ್ಥಾನಗಳು, ನೇಪಾಳದಲ್ಲಿ ಶೇ.33 ಸ್ಥಾನಗಳನ್ನು ಮೀಸಲಿಡಲಾಗಿದೆ. ಮಿಕ್ಕಂತೆ 40 ದೇಶಗಳು ಮಾತ್ರವೇ ಮಹಿಳೆಯರಿಗೆ ಸಂಸತ್ತಿನಲ್ಲಿ ಮೀಸಲು ಸ್ಥಾನಗಳನ್ನು ನೀಡಿವೆ. 50ಕ್ಕೂ ಹೆಚ್ಚು ದೇಶಗಳು ಪ್ರಾತಿನಿಧ್ಯಕ್ಕಾಗಿ ನಾನಾ ನಿಬಂಧನೆಗಳನ್ನು ವಿಧಿಸಿವೆ.
ಕೇಂದ್ರ ಸರಕಾರದ ಅಂಕಿ ಅಂಶಗಳ ಪ್ರಕಾರ, ಭಾರತದ ವಿವಿಧ ರಾಜ್ಯಗಳ 19 ವಿಧಾನಸಭೆಗಳಲ್ಲಿ ಮಹಿಳಾ ಸದಸ್ಯರ ಸಂಖ್ಯೆ ಶೇ.10ಕ್ಕಿಂತ ಕಡಿಮೆ! ದುರಂತ ಅಂದರೆ, ಈ ಪೈಕಿ ಕರ್ನಾಟಕವೂ ಒಂದು. ಮಹಿಳಾ ಪ್ರಾತಿನಿಧ್ಯವು ಶೇ.10ಕ್ಕಿಂತ ಹೆಚ್ಚಿರುವ ಅಸೆಂಬ್ಲಿಗಳೂ ಇವೆ. ಬಿಹಾರ- ಶೇ.10.70, ಛತ್ತೀಸ್‌ಗಢ- ಶೇ.14.44, ಹರಿಯಾಣ- ಶೇ.10, ಜಾರ್ಖಂಡ್‌- ಶೇ.12.35, ಪಂಜಾಬ್‌- ಶೇ. 11.11, ರಾಜಸ್ಥಾನ- ಶೇ.12, ಉತ್ತರಾಖಂಡ- ಶೇ.11.43, ಉತ್ತರ ಪ್ರದೇಶ- ಶೇ.11.66, ಪ. ಬಂಗಾಳ- ಶೇ.13.70, ದೆಹಲಿ- ಶೇ.11.43. ಗುಜರಾತ್‌ ಅಸೆಂಬ್ಲಿಯಲ್ಲಿ8.2 ಪ್ರತಿಶತ ಮಹಿಳಾ ಶಾಸಕರಿದ್ದರೆ, ಹಿಮಾಚಲ ಪ್ರದೇಶ ವಿಧಾನಸಭೆಯಲ್ಲಿಒಬ್ಬರೇ ಮಹಿಳಾ ಶಾಸಕರಿದ್ದಾರೆ!
ತಮಗೆ ಮೀಸಲಿಡದ ಕ್ಷೇತ್ರಗಳಲ್ಲೂ ಮಹಿಳೆಯರು ಚುನಾವಣೆಗೆ ಸ್ಪರ್ಧೆ ಮಾಡಬಹುದು. ಲೋಕಸಭೆ ಮತ್ತು ವಿಧಾನಸಭೆಯಲ್ಲಿ ಮಹಿಳೆಯರ ಪಾಲ್ಗೊಳ್ಳುವಿಕೆ ಹೆಚ್ಚಿಸಲಷ್ಟೇ ಈ ವಿಧೇಯಕ ತರಲಾಗಿದೆ. ಸಮರ್ಥ ನಾಯಕಿಯರಿದ್ದರೆ, ಪಕ್ಷಗಳು ಹೆಚ್ಚಿನ ಕ್ಷೇತ್ರಗಳಲ್ಲಿಅವರನ್ನು ನಿಲ್ಲಿಸಬಹುದು.
ವಿಧೇಯಕವು ಕಾನೂನಾದ ನಂತರ ಅಂದ್ರೆ 2029ರ ಸಂಸತ್‌ ಚುನಾವಣೆಗೆ ಇದು ಪರಿಪೂರ್ಣವಾಗಿ ಜಾರಿಗೊಳ್ಳುತ್ತದೆ. ಆಗ ಲೋಕಸಭೆಯಲ್ಲಿ 543 ಸಂಸದರ ಪೈಕಿ, 181 ಮಹಿಳಾ ಸಂಸದರು ಇರ್ತಾರೆ.. ಈಗ 82 ಮಹಿಳಾ ಸಂಸದರಷ್ಟೇ ಇದ್ದಾರೆ.
ಯೆಸ್, 1931ರಲ್ಲೇ ಸ್ವತಂತ್ರ ಪೂರ್ವದಲ್ಲೇ ಭಾರತದಲ್ಲಿ ಮಹಿಳಾ ಸಮಾನತೆ ಹೋರಾಟ ನಡೆದಿತ್ತು. ಬೇಗಂ ಶಾ ನವಾಜ್‌ ಮತ್ತು ಸರೋಜಿನಿ ನಾಯ್ಡು ಮೊಟ್ಟ ಮೊದಲ ಬಾರಿಗೆ ಮಹಿಳೆಯರಿಗೆ ಸಮಾನ ರಾಜಕೀಯ ಸ್ಥಾನಮಾನದ ಬೇಡಿಕೆ ಮುಂದಿಟ್ಟಿದ್ದರು. ಇದಾದ್ಮೇಲೆ, 1947ರಲ್ಲಿ ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕಾಗ ಹೋರಾಟಗಾರ್ತಿ ರೇಣುಕಾ ರೇ, ರಾಜಕೀಯವಾಗಿ ಮಹಿಳೆಯರ ಹಕ್ಕು ಮತ್ತು ಸ್ವಾತಂತ್ರ್ಯ ಖಾತರಿಪಡಿಸಬೇಕೆಂದು ಧ್ವನಿ ಎತ್ತಿದ್ದರು. ಇದಕ್ಕೆ ಆಗ ಪುಷ್ಟಿ ಸಿಗಲಿಲ್ಲ.
1971ರಲ್ಲಿ ಭಾರತದ ಮಹಿಳೆಯರ ಸ್ಥಾನಮಾನ ಅಧ್ಯಯನಕ್ಕೆ ಸಮಿತಿ ರಚನೆ ಮಾಡಲಾಗಿತ್ತು. ಆಗ ಸಮಿತಿಯ ಹಲವು ಸದಸ್ಯರು ಶಾಸಕಾಂಗ ಸಂಸ್ಥೆಗಳಲ್ಲಿ ಮಹಿಳೆಯರಿಗೆ ಮೀಸಲು ವಿರೋಧಿಸಿದ್ರೂ. ಆದ್ರೆ ಸ್ಥಳೀಯ ಸಂಸ್ಥೆಗಳ ವಿಚಾರದಲ್ಲಿ ಬೆಂಬಲಿಸಿದ್ದು ವಿಶೇಷವಾಗಿತ್ತು. ಬಳಿಕ 1974ರಲ್ಲಿ ಸಮಿತಿಯು ಮಹಿಳಾ ಪ್ರಾತಿನಿಧ್ಯವನ್ನು ಹೆಚ್ಚಿಸುವಂತೆ ಶಿಕ್ಷಣ ಮತ್ತು ಸಮಾಜ ಕಲ್ಯಾಣ ಸಚಿವಾಲಯಕ್ಕೆ ವರದಿ ಸಲ್ಲಿಸಿತು. ಈ ವರದಿಯಲ್ಲಿ ಪಂಚಾಯತ್‌ ಮತ್ತು ಪುರಸಭೆಗಳಲ್ಲಿ ಮಹಿಳೆಯರಿಗೆ ಸ್ಥಾನಗಳನ್ನು ಮೀಸಲಿಡಲು ಶಿಫಾರಸು ಮಾಡಿತ್ತು.
1993ರಲ್ಲಿ ಮಹತ್ವದ ಕ್ರಾಂತಿಕಾರಿ ಬದಲಾವಣೆ ಆಯ್ತು. ಆಗ 73, 74ನೇ ಸಾಂವಿಧಾನಿಕ ತಿದ್ದುಪಡಿ ಆಯ್ತು. ಪಂಚಾಯತ್‌ ಮತ್ತು ಪುರಸಭೆಗಳಲ್ಲಿ ಮಹಿಳೆಯರಿಗೆ 3ನೇ 1 ಭಾಗದಷ್ಟು ಮೀಸಲು ಜಾರಿ ಮಾಡಲಾಯ್ತು. ಇದರ ಪರಿಣಾಮ ಈಗ ದೇಶಾದ್ಯಂತ 15 ಲಕ್ಷ ಮಹಿಳಾ ಸದಸ್ಯರಿದ್ದಾರೆ.
ಸ್ಥಳೀಯ ಸಂಸ್ಥೆಗಳಲ್ಲಿ ಮಹಿಳಾ ಮೀಸಲಾತಿ ಕೊಟ್ಟ ಬಳಿಕ, 1996ರಲ್ಲಿ ಆಗ ಪ್ರಧಾನಿಗಳಾಗಿದ್ದ ಕನ್ನಡಿಗರ ಹೆಮ್ಮೆ ಹೆಚ್.ಡಿ. ದೇವೇಗೌಡರು ಮಹಿಳಾ ಮೀಸಲಾತಿ ಮಸೂದೆಯನ್ನ ಮಂಡಿಸಿದ್ರು. ಎಚ್‌.ಡಿ. ದೇವೇಗೌಡರ ಸರಕಾರವು 81ನೇ ಸಾಂವಿಧಾನಿಕ ತಿದ್ದುಪಡಿ ಮೂಲಕ ಮಹಿಳಾ ಮೀಸಲು ವಿಧೇಯಕವನ್ನು ಸಂಸತ್ತಿನಲ್ಲಿ ಮಂಡಿಸಿತು. ಬಳಿಕ ಅಲ್ಪಾವಧಿಯಲ್ಲಿಅವರ ಸರಕಾರವು ಅಲ್ಪಮತಕ್ಕೆ ಇಳಿದು, 11ನೇ ಲೋಕಸಭೆ ವಿಸರ್ಜನೆಯಾದ ಕಾರಣ ದೇವೇಗೌಡರ ಕನಸು ಕೈಗೂಡಲಿಲ್ಲ.
1998ರಲ್ಲಿ ಎನ್‌ಡಿಎ ಸರಕಾರವು 84 ನೇ ಸಾಂವಿಧಾನಿಕ ತಿದ್ದುಪಡಿ ತಂದು ಪುನಃ ವಿಧೇಯಕ ಮಂಡಿಸಿತು. ಇದನ್ನು ವಿರೋಧಿಸಿ ಆರ್‌ಜೆಡಿ ಸಂಸದರೊಬ್ಬರು ಮಸೂದೆ ಪ್ರತಿಯನ್ನು ಹರಿದು ಹಾಕಿದ್ದರು. ಸರಕಾರ ಕೆಲವು ದಿನಗಳಲ್ಲಿ ವಿಸರ್ಜನೆಗೊಂಡಿದ್ದರಿಂದ ವಿಧೇಯಕ ಮತ್ತೆ ಲ್ಯಾಪ್ಸ್ ಆಯಿತು. ಬಳಿಕ ಮತ್ತೆ 1999ರಲ್ಲಿ ಎನ್‌ಡಿಎ ಸರಕಾರ ಮತ್ತೊಮ್ಮೆ 13ನೇ ಲೋಕಸಭೆಯಲ್ಲಿ ವಿಧೇಯಕ ಮಂಡಿಸಿತು. ಆದರೆ, ಈ ವಿಷಯದಲ್ಲಿ ಪುನಃ ಒಮ್ಮತ ಸಂಗ್ರಹಿಸಲು ಸರಕಾರ ವಿಫಲವಾಯಿತು. 2002 ಮತ್ತು 2003ರಲ್ಲಿಎನ್‌ಡಿಎ ಸರಕಾರ 2 ಬಾರಿ ಲೋಕಸಭೆಯಲ್ಲಿ ವಿಧೇಯಕ ಮಂಡಿಸಿತು. ಆದರೆ, ಅಂಗೀಕರಿಸಲಾಗಲಿಲ್ಲ.
ಇಷ್ಟೆಲ್ಲ ಪ್ರಯತ್ನಗಳಾದ ಬಳಿಕ 2004ರಲ್ಲಿ ಯುಪಿಎ ಅಧಿಕಾರಕ್ಕೆ ಬಂದ ನಂತರ ತನ್ನ ಸಾಮಾನ್ಯ ಕನಿಷ್ಠ ಕಾರ್ಯಕ್ರಮದಲ್ಲಿ ವಿಧೇಯಕ ಅಂಗೀಕರಿಸುವ ಉದ್ದೇಶ ಪ್ರಕಟಿಸಿತ್ತು. 2008ರಲ್ಲಿ ಮನಮೋಹನ್‌ ಸಿಂಗ್‌ ಸರಕಾರವು ರಾಜ್ಯಸಭೆಯಲ್ಲಿ ವಿಧೇಯಕ ಮಂಡಿಸಿತು. ಇದಕ್ಕಾಗಿ ಸ್ಥಾಯಿ ಸಮಿತಿ ರಚಿಸಲಾಯಿತು. 2009ರಲ್ಲಿ ಸ್ಥಾಯಿ ಸಮಿತಿ ವರದಿ ಸಲ್ಲಿಕೆ ಮಾಡ್ತು. ಸಮಾಜವಾದಿ ಪಕ್ಷ, ಜೆಡಿಯು ಮತ್ತು ಆರ್‌ಜೆಡಿ ವಿರೋಧದ ನಡುವೆ ಸಂಸತ್ತಿನ ಉಭಯ ಸದನಗಳಲ್ಲಿ ವಿಧೇಯಕ ಮಂಡನೆ ಆಯ್ತು. 2010ರಲ್ಲಿ ರಾಷ್ಟ್ರಪತಿ ಪ್ರತಿಭಾ ಪಾಟೀಲ್‌ ತಮ್ಮ ಭಾಷಣದಲ್ಲಿ”ವಿಧೇಯಕ ಶೀಘ್ರವೇ ಅಂಗೀಕರಿಸಲು ಸರಕಾರ ಬದ್ಧವಾಗಿದೆ ಎಂದು ಹೇಳಿದ್ದರು.
2010ರಲ್ಲಿ ಮಹಿಳಾ ಮೀಸಲು ವಿಧೇಯಕಕ್ಕೆ ಕೇಂದ್ರ ಸಚಿವ ಸಂಪುಟ ಅನುಮೋದನೆ ನೀಡ್ತು. ರಾಜ್ಯಸಭೆಯಲ್ಲಿ ವಿಧೇಯಕ ಮಂಡನೆ ಆಯ್ತು. ಆದರೆ, ಎಸ್ಪಿ ಮತ್ತು ಆರ್‌ಜೆಡಿ, ಯುಪಿಎ ಸರಕಾರಕ್ಕೆ ನೀಡಿದ ಬೆಂಬಲ ಹಿಂಪಡೆಯುವುದಾಗಿ ಬೆದರಿಕೆ ಹಾಕಿದ ಪರಿಣಾಮ ಮತದಾನ ಮುಂದೂಡಿಕೆ ಆಯ್ತು.. ಆದ್ರೂ, 2010, ಮಾರ್ಚ್ 9ರಂದು ರಾಜ್ಯಸಭೆಯಲ್ಲಿ ವಿಧೇಯಕವು ಪರ 186 ವಿರುದ್ಧ 1 ಮತಗಳಿಂದ ಅಂಗೀಕಾರ ಆಯ್ತು. ಆದರೆ, ಲೋಕಸಭೆಯಲ್ಲಿ ಮಂಡಿಸಲು ಸಾಧ್ಯವಾಗಲಿಲ್ಲ. ಅಷ್ಟೊತ್ತಿಗಾಗ್ಲೇ ಯುಪಿಎ ಅವಧಿ ಮುಗೀತು.. ಕೇಂದ್ರದಲ್ಲಿ ಮೋದಿ ಶಕೆ ಶುರುವಾಯ್ತು.
2014, 2019ರ ಎರಡೂ ಲೋಕಸಭಾ ಚುನಾವಣೆಗೆ ಬಿಜೆಪಿ ತನ್ನ ಚುನಾವಣಾ ಪ್ರಣಾಳಿಕೆಯಲ್ಲಿ ಮಹಿಳೆಯರಿಗೆ ಶೇ.33 ಮೀಸಲು ಭರವಸೆ ನೀಡಿತು. ಆದರೆ, ಗಟ್ಟಿಯಾದ ಹೆಜ್ಜೆ ಇಟ್ಟಿರಲಿಲ್ಲ. ಇದೀಗ 2023ರಲ್ಲಿ ಹೊಸ ಸಂಸತ್ತಿನಲ್ಲಿ ಮೋದಿ ಸರ್ಕಾರ ಹೊಸ ಇತಿಹಾಸಕ್ಕೆ ನಾಂದಿ ಹಾಡಿದೆ. ಕೇಂದ್ರ ಕಾನೂನು ಸಚಿವ ಅರ್ಜುನ್‌ ರಾಮ್‌ಪಾಲ್‌, ಲೋಕಸಭೆಯಲ್ಲಿ ಮಹಿಳಾ ಮೀಸಲು ವಿಧೇಯಕ ಮಂಡನೆ ಮಾಡಿದ್ದಾರೆ. ‘ನಾರಿ ಶಕ್ತಿ ವಂದನಾ ಅಧಿನಿಯಮ’ ಎಂದು ಇದಕ್ಕೆ ಹೆಸರಿಡಲಾಗಿದೆ.
ಒಟ್ನಲ್ಲಿ ಹಲವು ದಶಕಗಳ ಕನಸು.. ಹಲವರ ಶ್ರಮ.. ಇದೀಗ ಸಾಕಾರ ಆಗ್ತಿದೆ.. ಪ್ರಯತ್ನಗಳು ಸಾಕಷ್ಟು ಬಾರಿ ಆಗಿವೆ.. ಇದೀಗ ಸದೃಢ ಸರ್ಕಾರ ಇದೆ.. ಹೀಗಾಗಿ ಈ ಬಾರಿ ವಿಧೇಯಕ ಕಾನೂನಿನ ರೂಪ ಪಡೆಯೋದ್ರಲ್ಲಿ ನೋ ಡೌಟ್.. ಆದ್ರೆ, 33 ಓಕೆ.. ಶೇಕಡಾ 50ರಷ್ಟು ಯಾಕಿಲ್ಲ.? ಶೇಕಡಾ 50ರಷ್ಟು ಮೀಸಲಾತಿ ಯಾವಾಗ..? ಇದು ಪ್ರಶ್ನೆಯಾಗಿ ಉಳಿದಿದೆ..
ಹೆಚ್ಚಿನ ಮಾಹಿತಿ ಈ ವೀಡಿಯೋದಲ್ಲಿದೆ ನೋಡಿ……….
Crypto currency; ಚಿಕ್ಕ ವಯಸ್ಸಿಗೆ ಕೋಟಿಗಟ್ಟಲೆ ಹಣ ಕಳೆದುಕೊಂಡ ಯುವಕ..!ಎಷ್ಟು ಗೊತ್ತಾ?
south korea: ಮಗಳನ್ನು ಹಿಂಬಾಲಿಸಿದ ತಾಯಿಗೆ ಆರು ತಿಂಗಳ ಜೈಲು ಶಿಕ್ಷೆ..!
