ಬೆಂಗಳೂರು : ಏಪ್ರಿಲ್ 22 ರಂದು ನಡೆದ ಭೀಕರ ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ ಭಾರತ ಮತ್ತು ಪಾಕಿಸ್ತಾನದ ನಡುವೆ ಉದ್ವಿಗ್ನತೆ ಮುಂದುವರೆದಿದೆ. ಈ ಮಧ್ಯೆ ಪಾಕಿಸ್ತಾನದಿಂದ ಇತ್ತೀಚೆಗೆ ಹೊರ ಬರುತ್ತಿರುವ ಬೆದರಿಕೆಗಳನ್ನು ಗಮನದಲ್ಲಿಟ್ಟುಕೊಂಡು ಅಣಕು ಕವಾಯತುಗಳನ್ನು ನಡೆಸುವಂತೆ ಕೇಂದ್ರ ಗೃಹ ಸಚಿವಾಲಯವು ಎಲ್ಲಾ ರಾಜ್ಯಗಳಿಗೆ ತಿಳಿಸಿದೆ. ಈ ಹಿನ್ನೆಲೆಯಲ್ಲಿ ದೇಶಾದ್ಯಂತ ಅಣಕು ಕವಾಯತುಗಳನ್ನು ಮೇ 7 ರ ಬುಧವಾರದಂದು ನಡೆಸಲು ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ. ಪಾಕಿಸ್ತಾನದ ಮೇಲೆ ಯುದ್ಧ ಸಾರಲು ದೇಶದ ಒಳಗೆ ಅಣಕು ವ್ಯಾಯಾಮಕ್ಕೆ, ಸಮರಾಭ್ಯಾಸಕ್ಕೆ ಈಗ ಮೋದಿ ಸರ್ಕಾರ ಮುಂದಾಗಿದೆ.
ನಾಗರಿಕ ರಕ್ಷಣಾ ಕಾರ್ಯವಿಧಾನಗಳ ಬಗ್ಗೆ ಅರಿತುಕೊಳ್ಳಲು ಮತ್ತು ಅವುಗಳನ್ನು ಹೆಚ್ಚಿಸಲು ಭಾರತದ ವಿವಿಧ ರಾಜ್ಯಗಳ 244 ಜಿಲ್ಲೆಗಳಲ್ಲಿ, ಗ್ರಾಮ ಮಟ್ಟದವರೆಗೆ ನಾಗರಿಕ ರಕ್ಷಣಾ ವ್ಯಾಯಾಮ ಮತ್ತು ಪೂರ್ವಾಭ್ಯಾಸವನ್ನು ನಡೆಸಲಾಗುವುದು. ಪಹಲ್ಗಾಮ್ ಭಯೋತ್ಪಾದಕ ದಾಳಿಯಲ್ಲಿ 26 ಜನರು ಸಾವನ್ನಪ್ಪಿದರು, ಅದರಲ್ಲಿ ಹೆಚ್ಚಿನವರು ಪ್ರವಾಸಿಗರಾಗಿದ್ದರು. ಈ ಬಳಿಕ ಭಾರತ ಮತ್ತು ಪಾಕಿಸ್ತಾನದ ನಡುವೆ ಉದ್ವಿಗ್ನತೆ ಹೆಚ್ಚಾಗಿದೆ. ದಾಳಿಯ ನಂತರ, ಭಾರತ ಸರ್ಕಾರವು ಬಲವಾದ ಮತ್ತು ಪರಿಣಾಮಕಾರಿ ಪ್ರತಿಕ್ರಿಯೆಯನ್ನು ನೀಡುವುದಾಗಿ ಪ್ರತಿಜ್ಞೆ ಮಾಡಿದೆ.
1971ರಲ್ಲಿ ಮಾಕ್‌ ಡ್ರಿಲ್ ನಡೆದಿತ್ತು..
ಈ ಹಿನ್ನೆಲೆಯಲ್ಲಿ ಕೇಂದ್ರ ಗೃಹ ಸಚಿವಾಲಯವು ಮೇ 7, 2025 ರಂದು ದೇಶದ 244 ವರ್ಗೀಕೃತ ನಾಗರಿಕ ರಕ್ಷಣಾ ಜಿಲ್ಲೆಗಳಲ್ಲಿ ನಾಗರಿಕ ರಕ್ಷಣಾ ವ್ಯಾಯಾಮ ಮತ್ತು ಪೂರ್ವಾಭ್ಯಾಸವನ್ನು ಆಯೋಜಿಸಲು ನಿರ್ಧರಿಸಿದೆ ಎಂದು ಗೃಹ ಸಚಿವಾಲಯವು ಎಲ್ಲಾ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಆಡಳಿತಾಧಿಕಾರಿಗಳಿಗೆ ಬರೆದ ಪತ್ರದಲ್ಲಿ ತಿಳಿಸಿದೆ. ಯುದ್ಧದ ಸಮಯದಲ್ಲಿ ನಾಗರಿಕರು ಕೈಗೊಳ್ಳಬೇಕಾದ ಮುನ್ನೇಚ್ಚರಿಕೆ ಕ್ರಮಗಳು, ಅದರಿಂದ ರಕ್ಷಣೆ ಮಾಡಿಕೊಳ್ಳಲು ಹೇಗೆಲ್ಲ ಪ್ರಯತ್ನಗಳನ್ನು ಮಾಡಬೇಕು ಎನ್ನುವುದರ ಬಗ್ಗೆ ಕಳೆದ 1971ರಲ್ಲಿ ದೇಶದಲ್ಲಿ ಅಣಕು ಪ್ರದರ್ಶನ ನಡೆದಿತ್ತು. ಅದಾದ ಬಳಿಕ ಈಗ ಅದನ್ನು ನಡೆಸುವ ಮೂಲಕ ಜನಸಾಮಾನ್ಯರು ಯುದ್ಧದ ಸನ್ನಿವೇಶವನ್ನು ಯಾವ ರೀತಿ ಎದುರಿಸಬೇಕು ಎಂಬೆಲ್ಲ ಮಾಹಿತಿಯನ್ನು ತಿಳಿದುಕೊಳ್ಳಲು ಇದು ಸಾಧ್ಯವಾಗಲಿದೆ.
ವೈಫಲ್ಯಗಳನ್ನು ತಿಳಿದುಕೊಳ್ಳಲು ಸಾಧ್ಯ..!
ಇನ್ನೂ ಅಣಕು ವ್ಯಾಯಾಮ ಅಥವಾ ಮಾಕ್‌ ಡ್ರಿಲ್ ಬಗ್ಗೆ ಇನ್ನಷ್ಟು ನೋಡುವುದಾದರೆ, ಪ್ರಮುಖವಾಗಿ ಬೆಂಕಿ, ಭೂಕಂಪಗಳು, ವೈದ್ಯಕೀಯ ತುರ್ತುಸ್ಥಿತಿಗಳು ಅಥವಾ ಭಯೋತ್ಪಾದಕ ದಾಳಿಗಳಂತಹ ನಿಜ ಜೀವನದ ಎಮರ್ಜನ್ಸಿ ಸನ್ನಿವೇಶಗಳನ್ನು ಎದುರಿಸಲು ಜನರು, ಸಂಸ್ಥೆಗಳು ಮತ್ತು ಅಧಿಕಾರಿಗಳನ್ನು ಸಿದ್ಧಪಡಿಸಲು ಅಣಕು ಡ್ರಿಲ್ ಒಂದು ಅಭ್ಯಾಸ ವ್ಯಾಯಾಮವಾಗಿದೆ. ಅಣಕು ಅಭ್ಯಾಸಗಳ ಮೂಲಕ, ಈ ಸಂದರ್ಭದಲ್ಲಿ ಒಂದು ದೇಶ ತುರ್ತು ಸಂದರ್ಭಗಳ ಪರಿಣಾಮಕಾರಿತ್ವವನ್ನು ಪರೀಕ್ಷಿಸುತ್ತದೆ ಮತ್ತು ತುರ್ತು ಪರಿಸ್ಥಿತಿಯಂತಹ ಸನ್ನಿವೇಶಗಳಲ್ಲಿ ಒದಗಿ ಬರಬಹುದಾದ ವೈಫಲ್ಯಗಳ ಬಗ್ಗೆ ತಿಳಿದುಕೊಳ್ಳಲು ಸಾಧ್ಯವಾಗುತ್ತದೆ.
ಕವಾಯತಿನ ಮಹತ್ವ..?
- ಯುದ್ಧ ಅಥವಾ ತುರ್ತು ಸಂದರ್ಭದಲ್ಲಿ ಜನರನ್ನು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಸಿದ್ಧಗೊಳಿಸುವುದಾಗಿದೆ.
- ಸೈರನ್‌ನ ಶಬ್ದವನ್ನು ಗುರುತಿಸುವುದು ಮತ್ತು ತುರ್ತು ಸಂದರ್ಭದಲ್ಲಿ ತಕ್ಷಣ ಕ್ರಿಯೆಗೆ ತೊಡಗುವ ಜಾಗೃತಿಯನ್ನು ಮೂಡಿಸುವುದು.
- ಸರ್ಕಾರ, ಆಡಳಿತ, ಮತ್ತು ಸಾರ್ವಜನಿಕರ ನಡುವೆ ಸಮನ್ವಯವನ್ನು ಸುಧಾರಿಸುವುದು.
- ದೇಶದ ರಕ್ಷಣಾ ವ್ಯವಸ್ಥೆಯ ಸಾಮರ್ಥ್ಯವನ್ನು ಪರೀಕ್ಷಿಸುವುದು.
ಕೇಂದ್ರದ ಲೆಕ್ಕಾಚಾರ ಏನು..?
ಅಲ್ಲದೆ ಮೇ 7 ಕ್ಕೆ ಭಾರತ ಏನು ಯೋಜಿಸುತ್ತಿದೆ? ಎನ್ನುವುದು ಇಡೀ ದೇಶಾದ್ಯಂತ ಮೂಡಿರುವ ಪ್ರಶ್ನೆಯಾಗಿದೆ. ಆದರೆ ಯುದ್ಧದ ಕುರಿತು ಜನಸಾಮಾನ್ಯರಲ್ಲಿ ಅರಿವು ಮೂಡಬೇಕು, ಆ ಸಂದಿಗ್ಧ ಸ್ಥಿತಿಯನ್ನು ನಿಭಾಯಿಸಲು ಸಾಧ್ಯವಾಗಬೇಕು. ಯೋಜನೆಗಳು, ರೇಡಿಯೋ ಸಂವಹನಗಳು, ವಾಯುದಾಳಿ ಎಚ್ಚರಿಕೆ ಸಂದೇಶಗಳು, ನಿಯಂತ್ರಣ ಕೊಠಡಿ ಕಾರ್ಯಗಳು ಮತ್ತು ಇನ್ನೂ ಹೆಚ್ಚಿನ ನಾಗರಿಕ ರಕ್ಷಣೆಯ ಪರಿಣಾಮಕಾರಿ ನಡೆಯನ್ನು ಪರೀಕ್ಷಿಸಲು ಮೇ 7 ರಂದು ಅಣಕು ಕವಾಯತುಗಳನ್ನು ನಡೆಸುವಂತೆ ಎಲ್ಲಾ ರಾಜ್ಯಗಳಿಗೆ ನಿರ್ದೇಶನ ನೀಡಲಾಗಿದೆ. ಗೃಹ ಸಚಿವಾಲಯವು ದೇಶಾದ್ಯಂತ ಒಟ್ಟು 295 ದುರ್ಬಲ ಪಟ್ಟಣಗಳು ಅಥವಾ ಜಿಲ್ಲೆಗಳನ್ನು ಗುರುತಿಸಿದ್ದು, ಶಾಂತಿಕಾಲದಲ್ಲಿ ನಾಗರಿಕ ರಕ್ಷಣಾ ಕ್ರಮಗಳನ್ನು ಜಾರಿಗೆ ತರಬೇಕಾಗಿದೆ ಎಂದು ಕೇಂದ್ರ ತಿಳಿಸಿದೆ. ಕರ್ನಾಟಕದಲ್ಲಿಯೂ ಕೂಡ ಕಾರವಾರ, ರಾಯಚೂರು ಹಾಗೂ ಬೆಂಗಳೂರಿನಲ್ಲಿ ಈ ಮಾಕ್‌ ಡ್ರಿಲ್ ನಡೆಯಲಿದೆ.
ಮಾಕ್‌ ಡ್ರಿಲ್‌ಗೆ ರಾಜ್ಯಗಳ ಸಿದ್ಧತೆ ಹೇಗಿದೆ..?
ಇನ್ನೂ ಈ ಮಾಕ್‌ ಡ್ರಿಲ್‌ಗೆ ರಾಜ್ಯ ಸರ್ಕಾರಗಳು ಕೂಡ ತಮ್ಮದೇ ಆದ ರೀತಿಯಲ್ಲಿ ಸಿದ್ಧತೆಯನ್ನು ಕೈಗೊಂಡಿವೆ. ಕೇಂದ್ರದ ಅಣಕು ವ್ಯಾಯಾಮಿಗೆ ರಾಜ್ಯಗಳು, ವಾಯುದಾಳಿ ಎಚ್ಚರಿಕೆ ವ್ಯವಸ್ಥೆಗಳ ಪರಿಣಾಮವನ್ನು ನಿರ್ಣಯಿಸುವುದು. ಭಾರತೀಯ ವಾಯುಪಡೆ ಜೊತೆಗಿನ ಹಾಟ್‌ಲೈನ್ ಮತ್ತು ರೇಡಿಯೋ ಸಂವಹನ ಸಂಪರ್ಕಗಳನ್ನು ಪರಿಶೀಲಿಸಿ ನಿಯಂತ್ರಣ ಕೊಠಡಿಗಳು ಮತ್ತು ನೆರಳು ಕೊಠಡಿಗಳ ಕಾರ್ಯವನ್ನು ಗಮನಿಸುವುದು. ಪ್ರತಿಕೂಲ ದಾಳಿಯ ಸಂದರ್ಭದಲ್ಲಿ ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ನಾಗರಿಕ ರಕ್ಷಣಾ ಅಂಶಗಳ ಕುರಿತು ವಿದ್ಯಾರ್ಥಿಗಳು ಸೇರಿದಂತೆ ನಾಗರಿಕರಿಗೆ ತರಬೇತಿ ನೀಡಬೇಕು. ಅಪಘಾತ ತಡೆಗಟ್ಟುವಿಕೆ ಕ್ರಮಗಳ ಅನುಷ್ಠಾನ.
ಹಂತ ಹಂತದ ಡ್ರಿಲ್ ಐದು ಪ್ರಮುಖ ಘಟಕಗಳನ್ನು ಒಳಗೊಂಡಿರುತ್ತದೆ, ಪ್ರತಿಯೊಂದೂ ನಾಗರಿಕ ರಕ್ಷಣೆಯ ಪ್ರಮುಖ ಅಂಶವನ್ನು ಗುರಿಯಾಗಿಸುತ್ತದೆ. ಏರ್ ರೈಡ್ ಸೈರನ್ ಗಳ ಬಳಕೆ, ದುರ್ಬಲ ನಗರ ಕೇಂದ್ರಗಳು ಮತ್ತು ಸ್ಥಾಪನೆಗಳಲ್ಲಿ ಸೈರನ್ ಗಳನ್ನು ಪರೀಕ್ಷಿಸಲಾಗುವುದು ಮತ್ತು ಸಕ್ರಿಯಗೊಳಿಸಲಾಗುವುದು. ಈ ಎಚ್ಚರಿಕೆ ವ್ಯವಸ್ಥೆಗಳು ವೈಮಾನಿಕ ಬೆದರಿಕೆಗಳ ಬಗ್ಗೆ ಸಾರ್ವಜನಿಕರನ್ನು ಎಚ್ಚರಿಸುತ್ತವೆ, ಜನರಿಗೆ ಸುರಕ್ಷತೆಯನ್ನು ಕಂಡುಹಿಡಿಯಲು ನಿರ್ಣಾಯಕ ಸೆಕೆಂಡುಗಳನ್ನು ನೀಡಲಾಗುತ್ತದೆ.
ಅಣಕು ಕವಾಯತಿನ ಸಂದರ್ಭದಲ್ಲಿ ಜನರ ನಡವಳಿಕೆ ಹೇಗಿರಬೇಕು?
- ಅಣಕು ಕವಾಯತಿನ ಸಂದರ್ಭದಲ್ಲಿ ಜನರು ಆತಂಕಕ್ಕೊಳಗಾಗಬಾರದು. ಏಕೆಂದರೆ ಇದು ಕೇವಲ ತರಬೇತಿ ವ್ಯಾಯಾಮವಾಗಿದೆ.
- ಸರ್ಕಾರದ ಸೂಚನೆಗಳನ್ನು ಗಮನಿಸಿ (ಟಿವಿ, ರೇಡಿಯೋ, ಅಥವಾ ಮೊಬೈಲ್ ಎಚ್ಚರಿಕೆಗಳ ಮೂಲಕ). ಕವಾಯತಿನ ಭಾಗವಾಗಿ, ಸುರಕ್ಷಿತ ಸ್ಥಳಕ್ಕೆ ತೆರಳುವ ಅಭ್ಯಾಸವನ್ನು ಮಾಡಿ.
- ನಿಜವಾದ ತುರ್ತು ಸಂದರ್ಭದಲ್ಲಿ ತಕ್ಷಣ ಸುರಕ್ಷಿತ ಸ್ಥಳಕ್ಕೆ ತೆರಳಬೇಕು ಉದಾಹರಣೆಗೆ, ಮನೆಯ ಒಳಗೆ, ಕಟ್ಟಡದ ಒಳಗೆ, ಅಥವಾ ಸರ್ಕಾರವು ಗೊತ್ತುಪಡಿಸಿದ ಬಂಕರ್‌ಗೆ. ತೆರೆದ ಪ್ರದೇಶಗಳಿಂದ ದೂರವಿರಿ.
- ವದಂತಿಗಳನ್ನು ನಂಬದಿರಿ ಮತ್ತು ಆಡಳಿತದ ಸೂಚನೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿ.
ಸಮುದಾಯ ಕೇಂದ್ರಗಳಲ್ಲಿ ಕಾರ್ಯಾಗಾರಗಳು..
ನಾಗರಿಕರಿಗೆ ತರಬೇತಿ ಶಾಲೆಗಳು, ಕಚೇರಿಗಳು ಮತ್ತು ಸಮುದಾಯ ಕೇಂದ್ರಗಳಲ್ಲಿ ಕಾರ್ಯಾಗಾರಗಳು ನಡೆಯಲಿವೆ. ಡ್ರಾಪ್-ಅಂಡ್-ಕವರ್ ತಂತ್ರಗಳು, ಹತ್ತಿರದ ಆಶ್ರಯ ಕೇಂದ್ರಗಳನ್ನು ಪತ್ತೆಹಚ್ಚುವುದು, ಮೂಲಭೂತ ಪ್ರಥಮ ಚಿಕಿತ್ಸೆ ಮತ್ತು ಒತ್ತಡದಲ್ಲಿ ಶಾಂತವಾಗಿರುವುದು ಹೀಗೆ ದಾಳಿಯ ಸಮಯದಲ್ಲಿ ಯಾವ ರೀತಿ ಪ್ರತಿಕ್ರಿಯಿಸಬೇಕು ಎಂಬುದನ್ನು ಜನರಿಗೆ ಹೇಳಿಕೊಡಬೇಕು. ಕ್ರ್ಯಾಶ್ ಬ್ಲ್ಯಾಕೌಟ್ ಗಳು, ಸಂಭಾವ್ಯ ರಾತ್ರಿ ವೇಳೆ ವೈಮಾನಿಕ ದಾಳಿಯ ಸಮಯದಲ್ಲಿ ಪತ್ತೆಯಾಗುವುದನ್ನು ತಪ್ಪಿಸಲು ನಗರಗಳು ಹಠಾತ್ ಬ್ಲ್ಯಾಕೌಟ್ಗಳನ್ನು ಅನುಕರಿಸುತ್ತವೆ, ಎಲ್ಲಾ ಲೈಟ್‌ಗಳನ್ನು ಆಫ್ ಮಾಡಲಾಗುತ್ತದೆ. ಈ ತಂತ್ರವನ್ನು ಕೊನೆಯದಾಗಿ 1971 ರ ಬಾಂಗ್ಲಾದೇಶ ವಿಮೋಚನಾ ಯುದ್ಧದ ಸಮಯದಲ್ಲಿ ವ್ಯಾಪಕವಾಗಿ ಬಳಸಲಾಗಿತ್ತು.
ಮರೆಮಾಚುವ ಅಭ್ಯಾಸ, ಮಿಲಿಟರಿ ನೆಲೆಗಳು, ಸಂವಹನ ಗೋಪುರಗಳು ಮತ್ತು ವಿದ್ಯುತ್ ಸ್ಥಾವರಗಳು ಸೇರಿದಂತೆ ಕಾರ್ಯತಂತ್ರದ ಕಟ್ಟಡಗಳು ಮತ್ತು ಸ್ಥಾಪನೆಗಳು ಕ್ಯಾಮೌಫ್ಲೇಜಿಂಗ್ಗೆ ಒಳಗಾಗುತ್ತವೆ. ಇದು ಉಪಗ್ರಹ ಅಥವಾ ವೈಮಾನಿಕ ಕಣ್ಗಾವಲು ಸಮಯದಲ್ಲಿ ಅವುಗಳನ್ನು ಪತ್ತೆಹಚ್ಚಲು ಕಷ್ಟವಾಗುತ್ತದೆ. ವ್ಯಾಕ್ಯುಯೇಷನ್ ಡ್ರಿಲ್ ಗಳು, ಅಧಿಕಾರಿಗಳು ತಾವು ಸ್ಥಳಾಂತರಿಸುವ ಯೋಜನೆಗಳನ್ನು ಪೂರ್ವಾಭ್ಯಾಸ ಮಾಡುತ್ತಾರೆ, ಹೆಚ್ಚಿನ ಅಪಾಯದ ವಲಯಗಳಿಂದ ಜನರನ್ನು ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸುತ್ತಾರೆ. ಈ ಡ್ರೈ ರನ್ ಗಳು ಅಡೆತಡೆಗಳನ್ನು ಗುರುತಿಸಲು ಮತ್ತು ನೈಜ ತುರ್ತು ಸಂದರ್ಭಗಳಲ್ಲಿ ಸುಗಮ ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತವೆ.
