ನವದೆಹಲಿ: ಪ್ರಸಕ್ತ ಹಣಕಾಸು ವರ್ಷದಲ್ಲಿ ಹೆಚ್ಚಿನ ಬಂಡವಾಳ ವಿನಿಯೋಗ ಮತ್ತು ಮಧ್ಯಮ ಆದಾಯದ ಬೆಳವಣಿಗೆ ನಡುವೆಯೂ ದೇಶದ ಹಲವು ರಾಜ್ಯಗಳು ಸಾಲದ ಸುಳಿಯಲ್ಲಿ ಸಿಕ್ಕಿ ವಿಲವಿಲ ಒದ್ದಾಡುತ್ತಿವೆ. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಪ್ರಕಾರ 2024ರ ಮಾರ್ಚ್ವರೆಗೆ ಭಾರತದ ಎಲ್ಲಾ ರಾಜ್ಯ ಸರ್ಕಾರಗಳ ಒಟ್ಟು ಸಾಲ ಬರೋಬ್ಬರಿ 75 ಲಕ್ಷ ಕೋಟಿಯಷ್ಟಿದೆ. 2025ರ ಮಾರ್ಚ್ ವೇಳೆಗೆ ರಾಜ್ಯಗಳ ಈ ಸಾಲ 83.31 ಲಕ್ಷ ಕೋಟಿ ರೂಪಾಯಿ ಮೀರುವ ಸಾಧ್ಯತೆಯಿದೆ.
ನಂ.1 ಸಾಲಗಾರ ರಾಜ್ಯ: ತಮಿಳುನಾಡು
ಸಾಲದ ಮೊತ್ತ: ₹8.34 ಲಕ್ಷ ಕೋಟಿ
ನಂ.2 ಸಾಲಗಾರ ರಾಜ್ಯ: ಉತ್ತರ ಪ್ರದೇಶ
ಸಾಲದ ಮೊತ್ತ: ₹7.69 ಲಕ್ಷ ಕೋಟಿ
ನಂ.3 ಸಾಲಗಾರ ರಾಜ್ಯ: ಮಹಾರಾಷ್ಟ್ರ
ಸಾಲದ ಮೊತ್ತ: ₹7.22 ಲಕ್ಷ ಕೋಟಿ
ನಂ.4 ಸಾಲಗಾರ ರಾಜ್ಯ: ಪಶ್ಚಿಮ ಬಂಗಾಳ
ಸಾಲದ ಮೊತ್ತ: ₹6.58 ಕೋಟಿ
ನಂ.5 ಸಾಲಗಾರ ರಾಜ್ಯ: ಕರ್ನಾಟಕ
ಸಾಲದ ಮೊತ್ತ: ₹5.97 ಲಕ್ಷ ಕೋಟಿ
ನಂ.6 ಸಾಲಗಾರ ರಾಜ್ಯ: ರಾಜಸ್ಥಾನ
ಸಾಲದ ಮೊತ್ತ: ₹5.62 ಲಕ್ಷ ಕೋಟಿ
ನಂ.7 ಸಾಲಗಾರ ರಾಜ್ಯ: ಆಂಧ್ರ ಪ್ರದೇಶ
ಸಾಲದ ಮೊತ್ತ: ₹4.85 ಲಕ್ಷ ಕೋಟಿ
ನಂ.8 ಸಾಲಗಾರ ರಾಜ್ಯ: ಗುಜರಾತ್
ಸಾಲದ ಮೊತ್ತ: ₹4.67 ಲಕ್ಷ ಕೋಟಿ
ನಂ.9 ಸಾಲಗಾರ ರಾಜ್ಯ: ಕೇರಳ
ಸಾಲದ ಮೊತ್ತ: ₹4.29 ಲಕ್ಷ ಕೋಟಿ
ನಂ.10 ಸಾಲಗಾರ ರಾಜ್ಯ: ಮಧ್ಯಪ್ರದೇಶ
ಸಾಲದ ಮೊತ್ತ: ₹4.18 ಲಕ್ಷ ಕೋಟಿ
ರಾಜ್ಯಗಳು ಈ ರೀತಿ ಸಾಲದ ಸುಳಿಗೆ ಸಿಲುಕಲು ಅಸಲಿ ಕಾರಣಗಳೇನು ಅನ್ನೋ ಪ್ರಶ್ನೆಗೆ ಉತ್ತರ ಆರ್ಥಿಕ ಶಿಸ್ತು ಇಲ್ಲದಿರುವುದು. ರಾಜ್ಯಗಳ ಆದಾಯ ಕಡಿಮೆಯಿದ್ದು, ವೆಚ್ಚ ಮಾತ್ರ ದುಪ್ಪಟ್ಟು ಇರುವುದೇ ಈ ರೀತಿ ಸಾಲದ ಕೂಪಕ್ಕೆ ಸಿಲುಕಲು ಮುಖ್ಯ ಕಾರಣ. ರಾಜ್ಯಗಳು ಪಡೆದ ಸಾಲದ ಹಣವನ್ನು ಸರಿಯಾಗಿ ನಿರ್ವಹಿಸದಿದ್ರೆ ಅಥವಾ ಯಾವುದೇ ಆದಾಯದ ಮೂಲವೂ ಇಲ್ಲದಿದ್ರೆ ಆ ರಾಜ್ಯದ ಆರ್ಥಿಕ ಪರಿಸ್ಥಿತಿ ಮತ್ತಷ್ಟು ಹದಗೆಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.
ರಾಜ್ಯಗಳ ಆರ್ಥಿಕ ನಿರ್ವಹಣೆ ಹಳಿ ತಪ್ಪಲು ಕಾರಣವಾಗುವ ಸಂಗತಿ ಅಂದ್ರೆ ಉಚಿತ ಕೊಡುಗೆಗಳು. ಚುನಾವಣೆಗೂ ಮುನ್ನ ಸಾಲು ಸಾಲು ಉಚಿತ ಭರವಸೆಗಳನ್ನು ಜನರಿಗೆ ಕೊಡೋ ಸರ್ಕಾರಗಳು ಗೆದ್ಮೇಲೆ ತಮ್ಮ ಕುರ್ಚಿಯನ್ನ ಉಳಿಸಿಕೊಳ್ಳಲು ಹಠಕ್ಕೆ ಬಿದ್ದು ಉಚಿತ ಯೋಜನೆಗಳಿಗೆ ಖಜಾನೆಯಲ್ಲಿ ಇರೋ ಬರೋ ಹಣವನ್ನೆಲ್ಲಾ ವ್ಯಯಿಸುತ್ತವೆ. ಫ್ರೀ ಕರೆಂಟ್, ಉಚಿತ ನೀರು, ಉಚಿತ ಪಡಿತರ, ಉಚಿತ ಸಂಚಾರ, ನಗದು ರವಾನೆ, ಫ್ರೀ ಗ್ಯಾಸ್, ಉಚಿತ ಲ್ಯಾಪ್‌ಟಾಪ್‌, ಸ್ಮಾರ್ಟ್‌ಫೋನ್‌ ಅಥವಾ ಟಿವಿ, ನಿರುದ್ಯೋಗಿಗಳಿಗೆ ಭತ್ಯೆ ಹೀಗೆ ಸಾಲು ಸಾಲು ಫ್ರೀಬಿಸ್ಗಳಿಗೆ ಹಣ ಹೊಂದಿಸೋ ಭರದಲ್ಲಿ ರಾಜ್ಯಗಳಲ್ಲಿ ಅಭಿವೃದ್ಧಿ ಕಾರ್ಯಗಳು ಸಂಪೂರ್ಣವಾಗಿ ಹಳ್ಳ ಹಿಡಿಯುತ್ತವೆ. ಬಹುತೇಕ ರಾಜ್ಯಗಳ ಆರ್ಥಿಕ ಬಿಕ್ಕಟ್ಟಿಗೆ ಈ ಉಚಿತ ಕೊಡುಗೆಗಳೇ ಕಾರಣ ಅನ್ನೋದು ಆರ್ಥಿಕ ತಜ್ಞರ ವಾದವಾಗಿದೆ.
