ಶಿವಮೊಗ್ಗ : ಪ್ರತಿ ವರ್ಷ ಡಿಸೆಂಬರ್ 5 ರಂದು ಮಾರುತಿ ಜನ್ಮದಿನದ ಸಂಭ್ರಮವನ್ನು ತುಂಬಾ ಅದ್ಧೂರಿಯಾಗಿ ಮಾಡುತಿದ್ದಾರೆ. ಆರು ವರ್ಷಗಳ ಹಿಂದೆ ಶಿವಮೊಗ್ಗ ನಗರದ ಪಾರ್ವತಮ್ಮ ಕುಟುಂಬಕ್ಕೆ ಕೋತಿ ಮರಿಯನ್ನು ಯಾರೋ ಸಾಕಲು ಆಗದೇ ಕೊಟ್ಟು ಹೋಗಿದ್ದರು, ಪಾರ್ವತಮ್ಮ ಅವರ ಪತಿ ಪ್ರಭಾಕರ್ ಕೆಲವರ್ಷಗಳ ಹಿಂದೆ ಮೃತಪಟ್ಟಿದ್ದಾರೆ. ಮನೆಯಲ್ಲಿ ಇಬ್ಬರು ಹೆಣ್ಣು ಮತ್ತು ಇಬ್ಬರು ಗಂಡು ಮಕ್ಕಳು ಇದ್ದಾರೆ. ಒಟ್ಟು ಐವರು ಸದಸ್ಯರಿಂದ ಕೂಡಿದ ಕುಟುಂಬ ಇವರದ್ದು, ನಾಲ್ಕು ತಿಂಗಳ ಪುಟ್ಟ ಕೋತಿ ಮರಿಯನ್ನು ನೋಡಿದ ಪಾರ್ವತಮ್ಮ ಮತ್ತು ಅವರ ಕುಟುಂಬಸ್ಥರು ಸಾಕುವ ನಿರ್ಧಾರ ಮಾಡಿದ್ದರು.
ಮರಿಯನ್ನು ಕಳೆದ ಆರು ವರ್ಷದಿಂದ ಕುಟುಂಬಸ್ಥರು ಆರೈಕೆ ಮಾಡುತ್ತಿದ್ದಾರೆ. ಪ್ರೀತಿ, ವಾತ್ಸಲ್ಯ, ಮಮಕಾರದಿಂದ ಕೋತಿ ಮರಿಯನ್ನು ತುಂಬಾ ಮುದ್ದಾಗಿ ಸಾಕಿದ್ದಾರೆ. ಈ ಮರಿಗೆ ಮಾರುತಿ ಎಂದು ನಾಮಕರಣ ಮಾಡಿದ್ದಾರೆ. ಪಾರ್ವತಮ್ಮ ಅವರಿಗೆ ನಾಲ್ಕು ಮಕ್ಕಳ ಜೊತೆ ಮಾರುತಿ ಕೂಡ ಒಬ್ಬ ಮಗುವಾಗಿದೆ. ಮಾರುತಿ ಕೂಡಾ ಇವರ ಕುಟುಂಬದ ಸದಸ್ಯನಾಗಿಬಿಟ್ಟಿದ್ದಾನೆ ಅದರಂತೆ ನಿನ್ನೆ ಆರನೇ ವರ್ಷದ ಮಾರುತಿ ಹುಟ್ಟಿದ ಹಬ್ಬವು ಸಂಭ್ರಮ ಸಡಗರಿಂದ ಕುಟುಂಬದ ಸದಸ್ಯರೆಲ್ಲರೂ ಸೇರಿ ಆಚರಿಸಿದರು.ಮಾರುತಿ ಹುಟ್ಟುಹಬ್ಬಕ್ಕೆ ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಎಸ್ ಈಶ್ವರಪ್ಪ ಮತ್ತು ಚಿಕ್ಕಮಗಳೂರಿನ ಜಿಲ್ಲೆಯ ತಾವರೆಕೆರೆಯ ಶಿಲಾ ಮಠದ ಶ್ರೀ ಅಭಿನವ ಸಿದ್ದಲಿಂಗ ಶಿವಾಚಾರ್ಯ ಕಿರಿಯ ಶ್ರೀಗಳು ಸೇರಿದಂತೆ ಅಕ್ಕಪಕ್ಕದವರು ಭಾಗವಹಿಸಿದ್ದರು. ಕುಟುಂಬಸ್ಥರ ಕೋತಿ ಪ್ರೀತಿ ಕಂಡು ಸಚಿವರು ಮತ್ತು ಸ್ವಾಮೀಜಿಗಳು ಅಚ್ಚರಿ ಮತ್ತು ಸಂತಸಪಟ್ಟರು.
ಮಾರುತಿಗೆ ನಿತ್ಯ ಸ್ನಾನ, ಕಲರ್ ಫುಲ್ ಬಟ್ಟೆಗಳು, ಮನೆಯವರು ಸಿದ್ಧಪಡಿಸಿದ ತಿಂಡಿ ಊಟವನ್ನು ಮಾಡುತ್ತದೆ. ಅದರಲ್ಲೂ ತರಕಾರಿ ಮತ್ತು ಹಣ್ಣು ಕೋತಿಗೆ ಹೆಚ್ಚು ಪ್ರೀತಿ.ಇನ್ನೂ ಕುಟುಂಬದ ಸದಸ್ಯರು ಎಲ್ಲೇ ಹೊರಗಡೆ ಹೊರಟರು ಮಾರುತಿಯನ್ನು ಜೊತೆಗೆ ಕರೆದುಕೊಂಡು ಹೋಗುತ್ತಾರೆ. ಹೊಟೇಲ್ನಲ್ಲಿ ಮಾರುತಿ ಜ್ಯೂಸ್ಗಳನ್ನು ಮಾತ್ರ ಸೇವಿಸುತ್ತಾನೆ. ಐಸ್ ಕ್ರಿಂ ಅಂದರೆ ಮಾರುತಿಗೆ ಇಷ್ಟ. ಹೀಗೆ ಕುಟುಂಬಸ್ಥರು ಕೋತಿ ಮರಿಗೆ ಎಲ್ಲಿಲ್ಲದ ಪ್ರೀತಿ ಅಕ್ಕರೆಯನ್ನು ತೋರಿಸುತ್ತಾರೆ. ಕುಟುಂಬದ ಸದಸ್ಯನಂತೆ ಮಾರುತಿ ಒಡನಾಟ ಇಟ್ಟುಕೊಂಡಿದ್ದಾನೆ. ಕೇವಲ ಕುಟುಂಬಸ್ಥರಿಗೆ ಮಾತ್ರವಲ್ಲದೆ ಅಕ್ಕಪಕ್ಕದ ಮನೆಯನವರಿಗೂ ಮಾರುತಿ ಕಂಡರೆ ಇಷ್ಟ. ಇನ್ನೂ ಕೋತಿಯು ಮನೆಯಲ್ಲಿರುವ ಬೆಕ್ಕಿನ ಜೊತೆ ಆಟವಾಡುತ್ತಿದೆ. ಇತರೆ ಪ್ರಾಣಿಗಳ ಜೊತೆ ಕೂಡಾ ಕೋತಿ ಮರಿಯು ಅನ್ಯೋನ್ಯವಾಗಿರುವುದು ವಿಶೇಷ.
