Tumakuru: ತಿಪಟೂರು ತಾಲ್ಲೂಕು ನಾಗರಘಟ್ಟ: ತಿಪಟೂರು ತಾಲ್ಲೂಕಿನ ನಾಗರಘಟ್ಟ ಗ್ರಾಮದ ಮುಖ್ಯ ರಸ್ತೆಯಲ್ಲಿ ಸಂಜೆ ಹೊತ್ತು ಚಿರತೆಯೊಂದು ಪ್ರತ್ಯಕ್ಷವಾಗಿದ್ದು, ಇಡೀ ಗ್ರಾಮದಲ್ಲಿ ಆತಂಕ ಸೃಷ್ಟಿಸಿದೆ. ಚಿರತೆ ರಸ್ತೆ ಮಧ್ಯೆ ಕುಳಿತಿರುವ ದೃಶ್ಯ ಮೊಬೈಲ್‌ನಲ್ಲಿ ಸೆರೆಯಾಗಿದ್ದು, ಈಗ ವೈರಲ್ ಆಗುತ್ತಿದೆ.
ಸಂಜೆ ಕತ್ತಲು ಆವರಿಸುತ್ತಿರುವ ಹೊತ್ತಿಗೆ, ನಾಗರಘಟ್ಟ ಗ್ರಾಮದ ರಸ್ತೆಯಲ್ಲಿ, ಎರಡೂ ಬದಿ ಗಿಡ-ಮರಗಳು ಮತ್ತು ವಿದ್ಯುತ್ ಕಂಬಗಳಿರುವ ಡಾಂಬರು ರಸ್ತೆಯ ಪಕ್ಕದಲ್ಲಿ ಒಂದು ದೊಡ್ಡ ಚಿರತೆ ಬಂದು ಕುಳಿತಿದೆ.
ಸುಮಾರು ಒಂದು ನಿಮಿಷಕ್ಕೂ ಹೆಚ್ಚು ಕಾಲ ಚಿರತೆ ಅಲ್ಲಿಂದ ಕದಲದೆ, ನಿರ್ಭಯವಾಗಿ ರಸ್ತೆಯಲ್ಲೇ ಕುಳಿತು ಸುತ್ತಮುತ್ತ ನೋಡುತ್ತಿತ್ತು. ಈ ದೃಶ್ಯವನ್ನು ಕಂಡ ಗ್ರಾಮಸ್ಥರು ದೂರದಲ್ಲೇ ನಿಂತು ಮೊಬೈಲ್‌ನಲ್ಲಿ ವಿಡಿಯೋ ಮಾಡಿದ್ದಾರೆ.
ನಂತರ ದೂರದಿಂದ ಹೆಡ್‌ಲೈಟ್ ಹಾಕಿಕೊಂಡು ಬೈಕ್ ಬರುತ್ತಿದ್ದಂತೆ, ಚಿರತೆ ಎದ್ದು ನಿಂತು ನಿಧಾನವಾಗಿ ರಸ್ತೆಯ ಎಡಬದಿಯ ಪೊದೆಗಳ ಕಡೆಗೆ ನಡೆದು ಕತ್ತಲೆಯಲ್ಲಿ ಮಾಯವಾಗಿದೆ. ಅದೃಷ್ಟವಶಾತ್ ಯಾರ ಮೇಲೂ ದಾಳಿ ಮಾಡಿಲ್ಲ.
ನಾಗರಘಟ್ಟ ಗ್ರಾಮದಲ್ಲಿ ಈ ಹಿಂದೆ ಚಿರತೆ ಕಾಣಿಸಿಕೊಂಡಿತ್ತು ಎಂಬ ಮಾತುಗಳಿದ್ದರೂ, ಈ ರೀತಿ ರಸ್ತೆ ಮಧ್ಯೆ ಬಂದು ಕುಳಿತಿರುವುದು ಇದೇ ಮೊದಲು ಎಂದು ಗ್ರಾಮಸ್ಥರು ಹೇಳುತ್ತಿದ್ದಾರೆ.
ಇದರಿಂದ ಶಾಲಾ ಮಕ್ಕಳು, ರೈತರು ಮತ್ತು ಸಂಜೆ ಕೆಲಸ ಮುಗಿಸಿ ಬರುವವರಲ್ಲಿ ಭಯ ಮನೆ ಮಾಡಿದೆ. ಜಾನುವಾರುಗಳ ಮೇಲೂ ದಾಳಿ ಮಾಡುವ ಭಯದಿಂದ ರೈತರು ಸಂಜೆಗೂ ಮುನ್ನವೇ ದನ-ಕರುಗಳನ್ನು ಮನೆಗೆ ತರುತ್ತಿದ್ದಾರೆ.
ಚಿರತೆ ಪತ್ತೆಯಾದ ವಿಡಿಯೋವನ್ನು ಅರಣ್ಯ ಇಲಾಖೆಗೆ ನೀಡಲಾಗಿದೆ. ಕೂಡಲೇ ಚಿರತೆ ಹಿಡಿಯಲು ಬೋನು ಇಟ್ಟು ಕಾರ್ಯಾಚರಣೆ ನಡೆಸಬೇಕು ಎಂದು ನಾಗರಘಟ್ಟ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
About The Author
