Sandalwood News: ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಮ್ಮನ್ನಗಲಿ ಇಂದಿಗೆ 3 ವರ್ಷವಾಗಿದೆ. ಇಂದು ಪುಣ್ಯಸ್ಮರಣೆಯಾಗಿರುವ ಕಾರಣ, ಪುನೀತ್ ಸಮಾಧಿಯ ಬಳಿ, ಸಾವಿರಾರು ಜನ ಅಪ್ಪು ಫ್ಯಾನ್ಸ್ ಬಂದು, ಕೈಮುಗಿದು ಹೋಗಿದ್ದಾರೆ. ಬರೀ ಬೆಂಗಳೂರಿನಲ್ಲಿರುವ ಅಪ್ಪು ಫ್ಯಾನ್ಸ್ ಅಲ್ಲದೇ, ಬೇರೆ ಬೇರೆ ಊರಿನಿಂದಲೂ ಅಪ್ಪು ಫ್ಯಾನ್ಸ್ ಬಂದು, ಅಪ್ಪು ಸಮಾಧಿ ದರ್ಶನ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಅಪ್ಪು ಅಭಿಮಾನಿಗಳ ಸಂಘದಿಂದ ಅನ್ನಸಂತರ್ಪಣಾ ಕಾರ್ಯಕ್ರಮವಿದ್ದು, ಸಾವಿರಾರು ಜನ ಊಟ ಸ್ವೀಕರಿಸಿದ್ದಾರೆ.
ಇನ್ನು ದೊಡ್ಮನೆಯವರೆಲ್ಲ ಸೇರಿ, ಇಂದು ಪುನೀತ್ ಸಮಾಧಿಗೆ ಪೂಜೆ ಸಲ್ಲಿಸಿದರು. ಅಶ್ವಿನಿ ಪುನೀತ್ ರಾಜ್‌ಕುಮಾರ್, ರಾಘವೇಂದ್ರ ರಾಜ್‌ಕುಮಾರ್ ಸೇರಿ ಇನ್ನು ಕೆಲವರು ಪುನೀತ್ ಸಮಾಧಿಗೆ ಭೇಟಿ ನೀಡಿದ್ದರು. ಈ ವೇಳೆ ಮಾತನಾಡಿದ ರಾಘವೇಂದ್ರ ರಾಜ್‌ಕುಮಾರ್, ಅಪ್ಪು ನಮ್ಮನ್ನಗಲಿ ಮೂರು ವರ್ಷವಾದರೂ, ಅವನ ಮೇಲಿಟ್ಟಿರುವ ಜನರ ಪ್ರೀತಿ ಕಡಿಮೆಯಾಗಲೇ ಇಲ್ಲ. ದಿನ ದಿನ ಹೆಚ್ಚಾಗುತ್ತಲೇ ಇದೆ.
ಪುನೀತ್ ಸಮಾಧಿಗೆ ಭೇಟಿ ಕೊಡುವವರ ಸಂಖ್ಯೆಯೂ ಹೆಚ್ಚಾಗಿದೆ. ನಾನು ಇವರಲ್ಲಿ ಮಾಡಿಕೊಳ್ಳುವ ಮನವಿ ಏನೆಂದರೆ, ಪುನೀತ್ ಮಾಡಿದಂತೆ ನೀವೂ ಸಮಾಜ ಸೇವೆ ಮಾಡಿ. ಅವಶ್ಯಕತೆ ಇದ್ದವರಿಗೆ ದಾನ ಮಾಡಿ. ಈ ರೀತಿಯ ಉತ್ತಮ ಕಾರ್ಯಗಳನ್ನು ಮಾಡುವುದೇ, ನಾವು ಪುನೀತ್‌ಗೆ ಕೊಡುವ ಗೌರವವೆಂದು ರಾಘವೇಂದ್ರ ರಾಜ್‌ಕುಮಾರ್ ಹೇಳಿದ್ದಾರೆ.
ಮೂರು ವರ್ಷಗಳ ಹಿಂದೆ ಈ ದಿನ ಪುನೀತ್‌ಗೆ ಹಠಾತ್ ಹೃದಯಾಘಾತವಾಗಿದ್ದು ಎಂಬ ಸುದ್ದಿ ಬಂದಿತ್ತು. ಸ್ಯಾಂಡಲ್‌ವುಡ್ ತಾರೆಯರು ಸುದ್ದಿ ಕೇಳಿದ ತಕ್ಷಣ, ಆಸ್ಪತ್ರೆಯ ಬಳಿ ಧಾವಿಸಿದ್ದರು. ಅದಾಗಲೇ ಪುನೀತ್ ಪ್ರಾಣಪಕ್ಷಿ ಹಾರಿಹೋಗಿತ್ತು. ಜಿಮ್‌ಗೆ ಹೋಗಿ ಬಂದು, ಸುಸ್ತಾಗಿದ್ದ ಪುನೀತ್, ಎದೆ ನೋವು ಎಂದು, ವೈದ್ಯರ ಬಳಿ ಹೋಗಿದ್ದಷ್ಟೇ, ಮತ್ತೆ ಮರಳಿ ಬರಲೇ ಇಲ್ಲ.
