ಬಂಗಾರ ಪ್ರಿಯರಿಗೆ ಬಿಗ್ ರಿಲೀಫ್ – ಒಂದೇ ಸಮನೆ ಕುಸಿದ ಚಿನ್ನ ಹಾಗೂ ಬೆಳ್ಳಿ ಬೆಲೆ!

ಮೈಕೈ ಸುಡುವ ರೀತಿಯಲ್ಲಿ ಸತತವಾಗಿ ಏರಿಕೆಯಾಗುತ್ತಲೇ ಇದ್ದ ಬಂಗಾರದ ಬೆಲೆಗೆ ಸದ್ಯಕ್ಕಂತೂ ಕೊಂಚ ಬ್ರೇಕ್ ಬಿದ್ದಿದೆ. ಹೌದು, ಒಂದೇ ಸಮನೆ ಗಗನಕ್ಕೇರುತ್ತಿದ್ದ ಚಿನ್ನದ ಬೆಲೆಯಲ್ಲಿ ಇದೀಗ ಭಾರಿ ಕುಸಿತ ಕಂಡುಬಂದಿದ್ದು, ಆಭರಣ ಪ್ರಿಯರು ನಿಟ್ಟುಸಿರು ಬಿಡುವಂತಾಗಿದೆ. ಬಂಗಾರ ಪ್ರಿಯರಿಗೆ ನಿಜಕ್ಕೂ ದೊಡ್ಡ ಗುಡ್ ನ್ಯೂಸ್ ಆಗಿರುವ ಈ ಬೆಲೆ ಇಳಿಕೆಯ ಹಿಂದಿನ ಅಸಲಿ ಕಾರಣ ಹಾಗೂ ಮುಂದಿನ ಮಾರುಕಟ್ಟೆ ವರದಿ ಏನು ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.

ದೇಶೀಯ ಮಾರುಕಟ್ಟೆಯಲ್ಲಿ ಅಂತರರಾಷ್ಟ್ರೀಯ ಬುಲಿಯನ್ ಮಾರ್ಕೆಟ್ ಪ್ರಭಾವದಿಂದಾಗಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸಕ್ಕತ್ ಇಳಿಕೆಯಾಗಿವೆ. ರಾಜಧಾನಿ ದೆಹಲಿಯಲ್ಲಿ 99.9 ರಷ್ಟು ಶುದ್ಧತೆಯ 10 ಗ್ರಾಂ ಚಿನ್ನದ ಬೆಲೆ ಒಂದೇ ಸಲ ಬರೋಬ್ಬರಿ 2,800 ರೂಪಾಯಿಗಳಷ್ಟು ಕುಸಿದು ಪ್ರಮುಖ ಮೈಲಿಗಲ್ಲನ್ನು ತಲುಪಿದೆ. ಅಷ್ಟೇ ಅಲ್ಲದೆ, ಬೆಳ್ಳಿ ಪ್ರಿಯರಿಗೂ ಕೂಡ ಬಿಗ್ ಶಾಕ್ ಎನ್ನುವಂತೆ ಒಂದು ಕಿಲೋ ಬೆಳ್ಳಿ ಬೆಲೆಯೂ ಕೂಡ ಬರೋಬ್ಬರಿ 6,000 ರೂಪಾಯಿಗಳಷ್ಟು ಭಾರಿ ಪ್ರಮಾಣದಲ್ಲಿ ಕುಸಿದಿದೆ.

ಇನ್ನು ಆಭರಣ ಪ್ರಿಯರು ಹೆಚ್ಚಾಗಿ ಬಳಸುವ 22 ಕ್ಯಾರೆಟ್ ಚಿನ್ನದ ಬೆಲೆಯು ಬೆಳಗಿನ ವೇಳೆಗೆ 10 ಗ್ರಾಂಗೆ 1,41,950 ರೂಪಾಯಿ ಇದ್ದದ್ದು, ಸಂಜೆ ವೇಳೆಗೆ ಭರ್ಜರಿ ಇಳಿಕೆ ಕಂಡು 1,40,800 ರೂಪಾಯಿಗೆ ತಲುಪಿದೆ. ಅಂದರೆ ಒಂದೇ ದಿನದಲ್ಲಿ ಬರೋಬ್ಬರಿ 1,150 ರೂಪಾಯಿಗಳವರೆಗೆ ಚಿನ್ನದ ಬೆಲೆ ತಗ್ಗಿದೆ. ಅದೇ ರೀತಿ ಅತ್ಯಂತ ಶುದ್ಧವಾದ 24 ಕ್ಯಾರೆಟ್ ಚಿನ್ನದ ಬೆಲೆಯೂ ಕೂಡ 1,260 ರೂಪಾಯಿಯವರೆಗೆ ಕಡಿಮೆಯಾಗಿದ್ದು, ಮಾರುಕಟ್ಟೆಯಲ್ಲಿ ಹೊಸ ಅಲೆಯುಂಟು ಮಾಡಿದೆ.

ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಉಂಟಾಗಿರುವ ಆರ್ಥಿಕ ದೌರ್ಬಲ್ಯ ಹಾಗೂ ಜಾಗತಿಕ ವಿದ್ಯಮಾನಗಳೇ ಈ ಹಠಾತ್ ಬೆಲೆ ಇಳಿಕೆಗೆ ಪ್ರಮುಖ ಕಾರಣ ಎಂದು ಮಾರುಕಟ್ಟೆ ತಜ್ಞರು ಮತ್ತು ವ್ಯಾಪಾರಿಗಳು ವಿಶ್ಲೇಷಿಸುತ್ತಿದ್ದಾರೆ. ಆದರೆ ಮಾರುಕಟ್ಟೆ ವಿಶ್ಲೇಷಕರ ಪ್ರಕಾರ, ಈ ಅಲ್ಪಾವಧಿಯ ಬೆಲೆ ಕುಸಿತವು ಮದುವೆ ಹಾಗೂ ಶುಭ ಸಮಾರಂಭಗಳಿಗೆ ಬಂಗಾರ ಖರೀದಿಸಲು ಕಾತರದಿಂದ ಕಾಯುತ್ತಿದ್ದವರಿಗೆ ನಿಜಕ್ಕೂ ಒಂದು ಸುವರ್ಣ ಅವಕಾಶವಾಗಿದೆ.

ಮುಂದಿನ ವಾರ ಮಾರುಕಟ್ಟೆಯಲ್ಲಿ ಚಿನ್ನದ ದರದಲ್ಲಿ ಮತ್ತಷ್ಟು ದೊಡ್ಡ ಬದಲಾವಣೆಗಳು ಹಾಗೂ ಏರಿಳಿತಗಳು ಆಗುವ ಸಾಧ್ಯತೆ ಇದೆ ಎಂದು ತಜ್ಞರು ಮುನ್ಸೂಚನೆ ನೀಡಿದ್ದಾರೆ. ನೀವೂ ಕೂಡ ಹೊಸ ಒಡವೆಗಳನ್ನು ಅಥವಾ ಹೂಡಿಕೆಗಾಗಿ ಬಂಗಾರ ಖರೀದಿಸುವ ಪ್ಲಾನ್ ಮಾಡಿದ್ದರೆ, ಸದ್ಯದ ಮಾರುಕಟ್ಟೆ ಪರಿಸ್ಥಿತಿಯನ್ನು ಬಳಸಿಕೊಳ್ಳುವುದು ಉತ್ತಮ ಎಂದು ವ್ಯಾಪಾರಿಗಳು ಸಲಹೆ ನೀಡುತ್ತಿದ್ದಾರೆ.