ಏಪ್ರಿಲ್-14ರಂದು ಕೆಜಿಎಫ್-2 ಸಿನಿಮಾ ರಿಲೀಸಾಯ್ತು. ಇವತ್ತಿಗೂ ಮೊದಲ ದಿನದಂತೆಯೇ ಅಭಿಮಾನಿಗಳು ಥಿಯೇಟರ್‌ಗೆ ಹೋಗಿ ಸಿನಿಮಾನ ನೋಡಿ ಎಂಜಾಯ್ ಮಾಡ್ತಿದ್ದಾರೆ ಜೊತೆಗೆ ಅಷ್ಟೇ ಫ್ರೆಶ್ ರೆಸ್ಪಾನ್ಸ್ ಈಗಲೂ ಎಲ್ಲೆಡೆ ಕಂಟಿನ್ಯೂ ಆಗ್ತಿದೆ. ಹೀಗಿರುವಾಗ ಕೆಜಿಎಫ್-2 ಬಿಡುಗಡೆಯ ವೇಳೆ ಕನ್ನಡ ಚಿತ್ರರಂಗದಲ್ಲಿ ಬೇರ ಯಾವ ಸಿನಿಮಾಗಳು ರಿಲೀಸಾಗಲಿಲ್ಲ. ಹೀಗಾಗಿ ಕಳೆದೊಂದು ವಾರದಿಂದ ರಾಕಿಭಾಯ್‌ದೇ ಎಲ್ಲೆಡೆ ಹವಾ ಆಗಿದ್ದು, ಇದೀಗ ಈ ಶುಕ್ರವಾರ ಸ್ಯಾಂಡಲ್‌ವುಡ್‌ನಲ್ಲಿ ಬರೋಬ್ಬರಿ 4 ಸಿನಿಮಾಗಳು ತೆರೆಕಂಡಿವೆ. ಇದರ ಜೊತೆಗೆ ತೆಲುಗು ಹಾಗೂ ತಮಿಳಿನಲ್ಲಿ ಒಂದು ಸಿನಿಮಾ, ಬಾಲಿವುಡ್‌ನಲ್ಲಿ 2 ಬಿಗ್‌ಬಜೆಟ್‌ನ ಚಿತ್ರಗಳು ತೆರೆಕಂಡಿದೆ.
ಸಂಚಾರಿ ವಿಜಯ್ ನಟನೆ ‘ಮೇಲೊಬ್ಬ ಮಾಯಾವಿ’
ಕನ್ನಡದ ಮೂರು ಸಿನಿಮಾಗಳಲ್ಲಿ ಪ್ರಮುಖ ಆಕರ್ಷಣೆ, ‘ಮೇಲೊಬ್ಬ ಮಾಯಾವಿ’. ಈ ಸಿನಿಮಾದಲ್ಲಿ ದಿವಂಗತ ನಟ ಸಂಚಾರಿ ವಿಜಯ್ ನಟಿಸಿದ್ದಾರೆ. ಸಿನಿಮಾದಲ್ಲಿ ಬಿಗ್‌ಬಾಸ್ ಖ್ಯಾತಿಯ ಚಕ್ರವರ್ತಿ ಚಂದ್ರಚೂಡ್ ಸಹ ನಟಿಸಿದ್ದಾರೆ. ಸಂಚಾರಿ ವಿಜಯ್ ನಟಿಸಿದ್ದ ಕೊನೆಯ ಸಿನಿಮಾಗಳಲ್ಲಿ ಇದು ಸಹ ಒಂದು. ಸಿನಿಮಾವನ್ನು ಬಿ ನವೀನ್ ಕೃಷ್ಣ ನಿರ್ದೇಶನ ಮಾಡಿದ್ದಾರೆ.
ಅಜಯ್ ರಾವ್ ನಟನೆಯ ‘ಶೋಕಿವಾಲ’
ನಟ ಅಜಯ್ ರಾವ್-ಸಂಜನಾ ಆನಂದ್ ಜೋಡಿಯಾಗಿ ನಟಿಸಿರುವ ಶೋಕಿವಾಲಾ ಇಂದು ರಿಲಿಸಾಗಿದೆ. ಸಿನಿಮಾವನ್ನು ಕ್ರಿಸ್ಟಲ್ ಪಾರ್ಕ್ ಪ್ರೊಡಕ್ಷನ್ ಹೌಸ್ ವತಿಯಿಂದ ಚಂದ್ರಶೇಖರ್ ಹಾಗೂ ಕಿಶೋರ್ ನಿರ್ಮಾಣ ಮಾಡಿದ್ದಾರೆ. ನಿರ್ದೇಶನ ಮಾಡಿರುವುದು ಜಾಕಿ. ಹಳ್ಳಿ ಸೊಗಡಿನ ಈ ಸಿನಿಮಾದಲ್ಲಿ ಶರತ್ ಲೋಹಿತಾಶ್ವ, ಗಿರೀಶ್ ಶಿವಣ್ಣ, ತಬಲಾನಾಣಿ, ಮುನಿರಾಜ್, ಪ್ರಮೋದ್ ಶೆಟ್ಟಿ ಇನ್ನೂ ಹಲವರು ನಟಿಸಿದ್ದಾರೆ.
‘ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’
ಕನ್ನಡದ ಸಿನಿಮಾ ‘ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಸಿನಿಮಾ ಸಹ ಇಂದು ರಿಲಿಸಾಗಿದೆ. ಸಾಮಾನ್ಯ ಕುಟುಂಬದ ಯುವಕನೊಬ್ಬ ಕಷ್ಟಪಟ್ಟು ದುಡಿದು ಉಳಿತಾಯ ಮಾಡಿದ್ದ ಹಣ ಒಮ್ಮೆಲೆ ಖಾತೆಯಿಂದ ನಾಪತ್ತೆಯಾದಾಗ ಅದನ್ನು ಹುಡುಕುವ ಕತೆಯನ್ನು ಈ ಸಿನಿಮಾ ಒಳಗೊಂಡಿದೆ. ಸಿನಿಮಾದಲ್ಲಿ ನಾಯಕನ ಪಾತ್ರದಲ್ಲಿ ದಿಗಂತ್ ನಟಿಸಿದ್ದಾರೆ. ನಾಯಕಿಯಾಗಿ ರಂಜನಿ ರಾಘವನ್ ನಟಿಸಿದ್ದಾರೆ. ವಿಶೇಷ ಪಾತ್ರದಲ್ಲಿ ಐಂದ್ರಿತಾ ರೇ ಸಹ ಇದ್ದಾರೆ. ಸಿನಿಮಾವನ್ನು ವಿನಾಯಕ ಕೋಡ್ಸರ ನಿರ್ದೇಶನ ಮಾಡಿದ್ದಾರೆ.
‘ರಾಜಿ’ ಕನ್ನಡ ಸಿನಿಮಾ ತೆರೆಗೆ
ರಾಘವೇಂದ್ರ ರಾಜ್‌ಕುಮಾರ್ ಮುಖ್ಯ ಪಾತ್ರದಲ್ಲಿ ನಟಿಸಿರುವ ‘ರಾಜಿ’ ಕನ್ನಡ ಸಿನಿಮಾ ಇಂದು ತೆರೆಗೆ ಬಂದಿದೆ. ಸಿನಿಮಾವನ್ನು ಪ್ರೀತಿ ಎಸ್ ಬಾಬು ನಿರ್ದೇಶನ ಮಾಡಿದ್ದಾರೆ. ಜೊತೆಗೆ ಒಂದು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ ಸಹ.
ಚಿರಂಜೀವಿ ನಟನೆಯ ‘ಆಚಾರ್ಯ’ ಇಂದೇ ಬಿಡುಗಡೆ
ಇನ್ನು ತೆಲುಗಿನ ಬಿಗ್ ಬಜೆಟ್, ಬಿಗ್ ಸ್ಟಾರ್ ಸಿನಿಮಾ ‘ಆಚಾರ್ಯ’ ಇಂದೇ ಬಿಡುಗಡೆ ಆಗಿದೆ. ಸಿನಿಮಾದಲ್ಲಿ ನಟ ಚಿರಂಜೀವಿ ಹಾಗೂ ರಾಮ್ ಚರಣ್ ತೇಜ ಒಟ್ಟಿಗೆ ನಟಿಸಿದ್ದಾರೆ. ಕೊರಟಾಲ ಶಿವ ನಿರ್ದೇಶನದ ಈ ಸಿನಿಮಾದಲ್ಲಿ ನಟಿ ಪೂಜಾ ಹೆಗ್ಡೆ ನಾಯಕಿ.
ಒಂದೇ ಸಿನಿಮಾದಲ್ಲಿ ದಳಪತಿ,ಸಮಂತಾ,ನಯನತಾರಾ!
ವಿಜಯ್ ಸೇತುಪತಿ, ನಯನತಾರಾ ಹಾಗೂ ಸಮಂತಾ ಮೂವರು ಒಟ್ಟಿಗೆ ನಟಿಸಿರುವ ‘ಕಾತು ವಾಕುಲ ರೆಂಡು ಕಾದಲ್’ ಸಿನಿಮಾ ಸಹ ಇಂದೇ ತೆರೆಗೆ ಬಂದಿದೆ. ಸಿನಿಮಾವನ್ನು ನಯನತಾರಾ ಬಾಯ್‌ಫ್ರೆಂಡ್ ವಿಘ್ನೇಷ್ ಶಿವನ್ ನಿರ್ದೇಶನ ಮಾಡಿದ್ದಾರೆ.
ಹಿಂದಿಯಲ್ಲಿ 2 ಬಿಗ್‌ಬಜೆಟ್ ಸಿನಿಮಾಗಳು ರಿಲೀಸ್..!
ಇನ್ನು ಹಿಂದಿಯಲ್ಲಿ ಇವತ್ತು ೨ ಸಿನಿಮಾಗಳು ಬಿಡುಗಡೆಯಾಗಿವೆ. ಹಿಂದಿ ರಾಷ್ಟ್ರಭಾಷೆ ಎಂದು ಬೀಗಿ ಕಿಚ್ಚನ ಒಂದೇ ಒಂದು ಟ್ವೀಟ್‌ಗೆ ಗಬ್‌ಚುಪ್ ಆಗಿರೋ ನಟ ಅಜಯ್‌ದೇವ್‌ಗನ್ ನಟಿಸಿ, ನಿರ್ದೆಶಿಸಿರೋ ‘ರನ್‌ವೇ 34’ ಇಂದು ಬಿಡುಗಡೆ ಆಗಿದೆ.ಅಜಯ್ ಜೊತೆಗೆ ಅಮಿತಾಬ್ ಬಚ್ಚನ್, ರಾಕುಲ್ ಪ್ರೀತ್ ಸಿಂಗ್ ಸಹ ನಟಿಸಿದ್ದಾರೆ. ಇದರ ಜೊತೆಗೆ ಟೈಗರ್ ಶ್ರಾಫ್ ಹಾಗೂ ನವಾಜುದ್ದೀನ್ ಸಿದ್ಧಕಿ ನಟಿಸಿರುವ ‘ಹೀರೋಪಂತಿ 2’ ಸಿನಿಮಾ ಸಹ ಇಂದು ಬಿಡುಗಡೆ ಆಗಿದೆ.
ಒಟ್ಟಾರೆಯಾಗಿ ಸಿನಿಪ್ರೇಮಿಗಳಿಗೆ ಈ ಸಿನಿ ಶುಕ್ರವಾರ ಎಲ್ಲಾ ಜಾನರ್ ಇರೋ ಸಿನಿಮಾಗಳು ರಿಲೀಸಾಗಿದ್ದು, ಕಂಪ್ಲೀಟ್ ಮನರಂಜನೆ ಕೊಡುವುದರಲ್ಲಿ ಡೌಟೇ ಇಲ್ಲ.
ಕರ್ನಾಟಕ ನ್ಯೂಸ್
