ಭಾರತದಲ್ಲಿರುವ 8 ಪ್ರಸಿದ್ಧ ರಾಮಮಂದಿರಗಳು..

ಭಾರತದಲ್ಲಿ ರಾಮಮಂದಿರದ ಬಗ್ಗೆ ಮಾತನಾಡಿದರೆ, ಎಲ್ಲರಿಗೂ ಮೊದಲು ನೆನಪಿಗೆ ಬರುವುದು, ಅಯೋಧ್ಯೆಯಲ್ಲಿ ತಯಾರಾಗುತ್ತಿರುವ ರಾಮಮಂದಿರ. ಆದ್ರೆ ನಾವಿಂದು ಭಾರತದಲ್ಲಿರುವ 8 ಪ್ರಸಿದ್ಧ ರಾಮಮಂದಿರಗಳ ಬಗ್ಗೆ ಮಾಹಿತಿ ನೀಡಲಿದ್ದೇವೆ.

1. ರಾಮ ಜನ್ಮ ಭೂಮಿ ಅಯೋಧ್ಯೆಯ ರಾಮ ಮಂದಿರ. ಈ ಮಂದಿರ ಕಟ್ಟುವ ಕೆಲಸ ನಡೆಯುತ್ತಿದ್ದು, ಇನ್ನು ಕೆಲ ವರ್ಷಗಳಲ್ಲೇ, ಸುಂದರವಾದ, ರಾಮನ ಬೃಹತ್ ಮೂರ್ತಿ ಇರುವ ರಾಮ ಮಂದಿರ ನಿರ್ಮಾಣವಾಗುತ್ತದೆ. ಈಗಲೇ ಹಲವರು ಈ ರಾಮ ಮಂದಿರಕ್ಕೆ ಹೋಗಲು ಕಾತುರದಿಂದ ಕಾಯುತ್ತಿದ್ದಾರೆ.
2. ಕೋದಂಡ ರಾಮ ದೇವಸ್ಥಾನ ಹಂಪಿ. ತುಂಗಭದ್ರಾ ನದಿ ತಟದಲ್ಲಿ ಇರುವ ಈ ದೇವಸ್ಥಾನದಲ್ಲಿ ರಾಮ, ಸೀತೆ ಮತ್ತು ಲಕ್ಷ್ಮಣನನ್ನು ಪೂಜಿಸಲಾಗುತ್ತದೆ. ಹೊಯ್ಸಳ ಶೈಲಿ ಮತ್ತು ದ್ರಾವೀಡ ಶೈಲಿಯಲ್ಲಿ ಈ ದೇವಸ್ಥಾನವನ್ನ ನಿರ್ಮಾಣ ಮಾಡಲಾಗಿದೆ.
3. ಕೋದಂಡ ರಾಮ ದೇವಸ್ಥಾನ. ಇದು ಆಂಧ್ರಪ್ರದೇಶದ ಒಂಟಿಮಿತ್ತಾ ಎಂಬಲ್ಲಿದೆ. ವಿಜಯನಗರ ಶೈಲಿಯಲ್ಲಿರುವ ಕೋದಂಡರಾಮ ದೇವಸ್ಥಾನದ ಶಿಲ್ಪ ಕಲೆ ಎಲ್ಲರ ಗಮನ ಸೆಳೆಯುವಂತಿದೆ. ಇಲ್ಲಿ ವರ್ಷಕ್ಕೆ ಲಕ್ಷಾಂತರ ಭಕ್ತರು ಭೇಟಿ ನೀಡುತ್ತಾರೆ. ಈ ದೇವಸ್ಥಾನವನ್ನ ಕೋದಂಡರಾಮನ ಭಕ್ತರಾದ ವೋಂತುಡು ಮತ್ತು ಮಿತ್ತುಡು ಎಂಬುವವರು ನಿರ್ಮಿಸಿದ್ದಾರೆ. ಇವರಿಬ್ಬರು ಮೊದಲು ಕಳ್ಳರಾಗಿದ್ದು, ನಂತರ ಕೋದಂಡ ರಾಮನ ಭಕ್ತರಾದರು. ಮಂದಿರ ಕಟ್ಟಿದ ಬಳಿಕ, ಇಲ್ಲೇ ಕಲ್ಲಾಗಿದ್ದಾರೆಂದು ಹೇಳಲಾಗುತ್ತದೆ.
4. ತಿರುವಾಂಗಡ ಶ್ರೀ ರಾಮಸ್ವಾಮಿ ದೇವಸ್ಥಾನ ಕೇರಳ. ಇದು ಕೇರಳದ ತಲಸ್ಸೆರಿ ಎಂಬಲ್ಲಿದೆ. ಇದನ್ನ ಬ್ರಾಸ್ ಪಗೋಡಾ ಅಂತಲೂ ಕರೆಯಲಾಗತ್ತೆ. ಪ್ರತಿವರ್ಷ ವಿಶು ಅಂದ್ರೆ ಸೌರಮಾನ ಯುಗಾದಿಯ ವೇಳೆ ಇಲ್ಲಿ ಜಾತ್ರೆ ನಡೆಯುತ್ತದೆ.
5. ಶ್ರೀ ರಾಮಸ್ವಾಮಿ ದೇವಸ್ಥಾನ ತಮಿಳುನಾಡು. ದೇವಸ್ಥಾನಗಳ ಊರು ಅಂತಾನೇ ಕರೆಯಲ್ಪಡುವ ಕುಂಭಕೋಣಂನಲ್ಲಿ ಈ ದೇವಸ್ಥಾನವಿದೆ. ತಂಜಾವೂರು ರಾಜನಾದ ಅಚ್ಯುತಪ್ಪಾ ನಾಯಕನ ಅವಧಿಯಲ್ಲಿ ಈ ದೇವಸ್ಥಾನವನ್ನ ನಿರ್ಮಾಣ ಮಾಡಲು ಶುರು ಮಾಡಲಾಗಿತ್ತು. ರಘುನಾಥ ನಾಯಕನ ಅವಧಿಗೆ ನಿರ್ಮಾಣ ಸಂಪೂರ್ಣಗೊಂಡಿತು.
6. ಕಾಲಾರಾಮ ದೇವಸ್ಥಾನ. ಇದು ಮಹಾರಾಷ್ಟ್ರದ ನಾಸಿಕ್ ಜಿಲ್ಲೆಯ ಪಂಚವಟಿಯಲ್ಲಿದೆ. ಪಂಚವಟಿಯಲ್ಲಿರುವ ಪುರಾತನ ದೇವಸ್ಥಾನಗಳಲ್ಲಿ ಕಾಲಾರಾಮ ದೇವಸ್ಥಾನ ಕೂಡ ಒಂದು. ಇಲ್ಲಿ ರಾಮನ ಮೂರ್ತಿ ಕಪ್ಪಾಗಿದ್ದು, ಇದೇ ಕಾರಣಕ್ಕೆ ಈ ಮೂರ್ತಿಯನ್ನ ಕಾಲಾರಾಮ್ ದೇವಸ್ಥಾನವೆಂದು ಕರೆಯಲಾಗುತ್ತದೆ.
7. ರಾಮ ಮಂದಿರ ಓಡಿಶಾ. ಓಡಿಶಾದ ರಾಜಧಾನಿ ಭುವನೇಶ್ವರದಲ್ಲಿ ಈ ದೇವಸ್ಥಾನವಿದ್ದು, ಇಲ್ಲಿ ಬರೀ ರಾಮನಷ್ಟೇ ಅಲ್ಲದೇ, ಸೀತೆ, ಹನುಮ, ಲಕ್ಷ್ಮಣನನ್ನು ಕೂಡ ಪೂಜಿಸಲಾಗುತ್ತದೆ. ಇಲ್ಲಿನ ಶಿಲ್ಪಕಲೆ ಅತ್ಯದ್ಭುತವಾಗಿದೆ.
8. ತೆಲಂಗಾಣದ ಭದ್ರಾಚಲಂ ರಾಮಮಂದಿರ. ಗೋದಾವರಿ ನದಿ ತೀರದಲ್ಲಿರುವ ಈ ದೇವಸ್ಥಾನವನ್ನ ರಾಮ- ಸೀತಾ ದೇವಸ್ಥಾನವೆಂದು ಕರೆಯಲಾಗತ್ತೆ. ಇದು ಬರೀ ದೇವಸ್ಥಾನವಷ್ಟೇ ಅಲ್ಲದೇ, ಪ್ರವಾಸಿ ತಾಣವೂ ಆಗಿದೆ.